Эрүүл мэндийн сайд Д.Сарангэрэлийг энэ сарын 21-ний өдрөөс өмнө огцруулахыг шаардсан улс төрийн суултаа маргаашаас эхлүүлэх гэж байгаа талаараа өнөөдөр АН-ын гишүүд мэдээлэл хийлээ.

АН-ын гишүүн М.Зундуйдаваа “Эрүүл мэндийн яамыг мэргэжлийн хүнээр удирдуулснаас болж монголын олон зуун хүүхдүүд сүрьеэ өвчин туслаа. Дархан-Уул аймагт дөрвөн сайхан хүүхдийн ээж эмч нарын буруугаас нас барж, Монголчууд тэмбүү өвчиндөө идэгдлээ гэдэг мэдээлэл дэлхий даяар тархаж байна. Эрүүл мэндийн яаманд хариуцлагагүйн зуд нүүрлэсэн учраас тус сайдыг 72 цагийн дотор огцрохыг шаардсан улс төрийн суултыг хийх гэж байна” гэв.
“Хөгжлийн түлхүүр эмэгтэйчүүд” ТББ-ын тэргүүн Г.Хажидмаа “Бид Эрүүл мэндийн сайд Д.Сарангэрэлийг огцруулах шаардлага хүргүүлсэн боловч хариу өгсөнгүй. Энэ хүн сайдынхаа суудлыг өгөхгүй гэж уйлж дуулж үлдсэн гэдэг мэдээлэл байна. Гэртээ л эрхэлдэг юм байгаа биз төрд эрхэлнэ гэж байхгүй. Д.Сарангэрэл сайд “Монголчууд тэмбүү өвчинд нэрвэгдсэн” гэдэг мэдээлэл тарааснаас болж гадаадад ажиллаж байгаа монголчууд ажлаасаа халагдаж байна. У.Хүрэлсүх сайдаа энэ тавь гарсан хүүхнээ тэтгэвэрт нь суулга л даа. Бүтэн сар яамных нь гадаа уулзахаар хүлээж байхад нэг удаа ирж үзэгдсэнгүй” гэлээ.

АН-ын Эрүүл мэндийн бодлогын зөвлөх Ж.Амарсанаа “Д.Сарангэрэлд сайдад сүрьеэ өвчин тархаж байна гэсэн зөвлөмжийг бүтэн жилийн өмнө өгсөн байхад арга хэмжээ авахгүй дарснаас болж сүрьеэ улс даяар тарлаа.
Тэмбүү өвчинг буруу илрүүлж байна. ХӨСҮТ-ийн албаны дарга Ганболдын өгсөн мэдээллээр тэмбүү өвчний хурдавчилсан шинжилгээ авдаг 52 лабораторид шалгалт хийхэд 72 хувь нь буруу оношилсон гэсэн байна. Энэ бол маш ноцтой асуудал. Тэмбүү өвчингүй хүнийг тэмбүүтэй гэж эмчлэх гэж байна шүү дээ. Гурван сая иргэнийхээ эрүүл мэндийн талаарх мэдээллийг гадны байгууллагад алдсан байж болзошгүй байна. Энэ мэдээллийг ЭМЯ-наас тас нуусан. Энэ бүх баримтуудыг сэтгүүлчдэд өгнө” хэмээв.

---