3х3 сагсанбөмбөгийн зургаа дахь удаагийн дэлхийн аварга шалгаруулах тэмцээн энэ сарын 18-23 өдрүүдэд Нидерланд улсын Амстердам хотноо зохион байгуулагдана.

Хамгийн анхны ДАШТ 2012 онд Грекийн Афин хотноо зохион байгуулагдсанаас хойш ийнхүү зургаа дахь удаа зохион байгуулагдах гэж байна. 

Өнгөрсөн хугацаанд эрэгтэйчүүдийн ангилалд Серб улсын шигшээ баг дөрвөн удаа түрүүлээд байгаа бол Катар улс нэг удаа түрүүлээд байгаа юм. Харин эмэгтэйчүүдийн ангилалд АНУ-ын шигшээ баг хоёр удаа Чех, ОХУ, Итали улсууд тус бүр нэг удаа түрүүлээд байна. Манай улсын эрэгтэй шигшээ баг өнгөрсөн жил шилдэг 8-д багтсан амжилтыг үзүүлсэн юм. 
Энэ жилийн ДАШТ-д эрэгтэй, эмэгтэй тус бүр 20 улсын шигшээ баг оролцож байгаа ба манай улс эрэгтэй, эмэгтэй бүтэн багаар оролцож байна. 

Эрэгтэй баг В хэсэгт ОХУ, Украйн, Эстон, Пуэрто Рико улсуудтай орсон байна. 

Эмэгтэй багийн хувьд С хэсгийг тэргүүлэн тоглох ба хэсэгтээ Румын, Иран, Чех, Испаний шигшээ багуудтай орсон байна. 

Тоглолтын хуваарь: /Зургаадугаар сарын 18-ны өдөр Улаанбаатарын цагаар/

• 16:50 ОХУ - Монгол /эрэгтэй/
• 17:15 Иран - Монгол /эмэгтэй/
• 18:55 Румын - Монгол /эмэгтэй/
• 20:50 Монгол - Эстони /эрэгтэй/