Ардчилсан намаас зохион байгуулж байгаа Гадаад харилцааны сайд Д.Цогтбаатар болон Хууль зүй дотоод хэргийн сайд Ц.Нямдоржийг огцруулах жагсаал нь хууль зөрчсөн талаар ЦЕГ-ын хэвлэл мэдээллийн төвөөс мэдэгдлээ.

ЦЕГ-ын Хэвлэл мэдээллийн төвийн дарга Б.Баатархүү “Ардчилсан намын гишүүд дэмжигчид жагсаал цуглаан хийх тухай мэдэгдлээ зургадугаар сарын 10-ны өдөр холбогдох дүүргүүдэд хүргүүлсэн байсан. Гэвч тэдгээр жагсаал цуглаан нь холбогдох хууль дүрмийг зөрчсөн байсан тул жагсаал цуглааныг бүртгэж авахаас татгалзсан хариуг өгсөн юм билээ. Тийм байхад жагсаал цуглаан хийсэн тул Зөрчлийн хэрэг нээн шалгаж байна. АН-ын гишүүн Т.Энхсайхан намайг жагсаал цуглаан хийсний төлөө баривчлах гэж байна. Миний нөхрийг хариуцлагатай албан тушаалтан ажлаас нь хална гэсэн гэх зэргээр мэдээлэл өгсөн. Цагдаагийн байгууллагаас ямар ч тийм үйлдэл гаргаагүй болохыг хариуцлагатайгаар мэдэгдэж байна” гэлээ.

---