™ watch
™ watch
Налайх дүүрэгт хятад иргэний хөрөнгө оруулалттай “Эрдэнийн хөгжил” ХХК-ийн нүүрсний уурхайд өнгөрсөн дөрөвдүгээр сарын 20-ны өдөр нэг хүн бэртэл авч гурван ажилчин нурангид дарагдан нас барсан хэрэг гарчээ. Уг хэргийн талаар өнөөдөр өмгөөлөгч Ц.Монгол, ар гэрийн төлөөлөл хэвлэлийн бага хурал зарлан мэдээлэл хийсэн юм.
Уурхайн нурангид 47 настай Б дөрвөн хүүхэдтэй, 30 гаруй настай Ц хоёр хүүхэдтэй, 20 гаруй настай Ш гурван хүүхэдтэй залуус даруулж амь насаа алдсан байна.
Уг уурхайд нийслэлийн МХГ-аас шалгалт хийн өнгөрсөн дөрөвдүгээр сарын 9-ны өдөр үйл ажиллагааг зогсоон лацадсан байна. Гэвч хэд хоногийн дараа шалгалтын ажил дууссан тул уурхайгаа ажиллуулахаар болсон тул ажилчиддаа эргүүлэн дуудсан байна. Ингээд өнгөрсөн дөрөвдүгээр сарын 18-ны өдөр бригадын дарга Оргил нэгдүгээр салаанд нуранги үүссэн тул ажилчдыг оруулахгүй байх саналыг компанийн удирдлагуудад хэлжээ. Тэгтэл хоёр хоногийн дараа “Эрдэнийн хөгжил” ХХК-ийн хятад удирдлага Халзан гэх нөхөр нуранги үүссэн байхад ажилчдыг орж ажил гэсэн тушаал өгсөн байна. Ингээд тун удалгүй нэгдүгээр салаанд нуранги үүсэж 20-50 насны гурван хүн дарагдаж, нэг хүн хүнд бэртэл авчээ. Энэ үед тус компанийн хятад удирдлага, мэргэжилтнүүд бүгд зугтаасан бөгөөд ар гэрийн төлөөлөлтэй уулзаагүй байна.
Хэрэг гарснаас хойш хоёр сарын хугацаанд Налайх дүүргийн цагдаагийн газар маш хангалтгүй, хайхрамжгүй хандаж ажилласны улмаас “Эрдэнийн хөгжил” ХХК-ийн хятад удирдлагууд хилээр гарч явсан бөгөөд хэргийн материал нь хаана явааг хэрхэн мөрдөж байгаа талаар ар гэрийнхэн нь ямар ч мэдээлэлгүй байсан тул өмгөөлөгч Ц.Монголд ханджээ.
Ингээд хэргийг сураглахад Улсын ерөнхий прокурор дээр харьяаллыг тогтоох нэрийдлээр 10 гаруй хонож, мөрдөн байцаах алба руу шилжүүлсэн хэмээсэн ч одоо хүртэл Эрүүгийн хэрэг үүсгээгүй байна гэдгийг өмгөөлөгч Ц.Монгол дурдаж байлаа. Тэрбээр “Хуулийн байгууллагын ажилтнуудын хариуцлагагүй, энэ хэрэгт огт ач холбогдол өгөхгүй, гэмт хэрэгтнүүдийг цаагуураа хаацайлж байна хэмээн хардаж байна” гэлээ.
“Эрдэнийн хөгжил” ХХК-ийн ажилтан М.Ганбат “Мэргэжлийн байгууллагын шалгалтын дараа ажилчиддаа дуудахад гаднах лацыг хөндөлгүй, өөр хаалгаар ажилчиддаа оруулан ажиллуулсан.Осол болохоос хэд хоногийн өмнө бригадын дарга нэгдүгээр салаанд нуранги үүссэн тул ажилчиддаа ажиллуулахгүй хэмээн нэг хоног амраасан. Гэтэл хэрэг болдог өдөр удирдлагууд дуудаж, ажил гэсэн тушаал өгсөн. Тухайн үед ажилчид нуранги үүссэнийг мэдэж байсан тул ажиллахгүй гэхэд хүчээр дарамтлан ажиллуулсан байгаа.
Ингээд 20:00 цагийн үед нурангид хүмүүс дарагдлаа хэмээн шөнийн гурван цагт осолдсон иргэдийг гаргаж авах үед уурхайн удирдлагуудаас хэн ч байгаагүй. Цагдаагийн байгууллагад очиход холбогдох хүмүүсээс нь байцаалт авсан. Одоо та нар өөр өөрсдийн ажлаа бод хэмээн явуулсан. Цэл залуухан гурван анд маань амь насаа алдсан байхад хууль хяналтын байгууллага хэргийг хөөцөлдөж байгаа зүйл алга, ар гэрт нь тусалсан зүйл одоогоор байхгүй байна” гэсэн юм.
Хэргийг шийдэж “Эрдэнийн хөгжил” ХХК-иас амиа алдсан гурван хүний үр хүүхдүүдийг нь 18 нас хүртэл нь асран хамгаалах, мөнгөн тэтгэмж олгоосой хэмээн хүсэж байна. Гурван эхнэр, есөн хүүхэдтэйгээ хэрхэн яаж амьдрахаа мэдэхгүй, хэцүү байна
Уурхайн осолд амиа алдсан Б-гийн эхнэр Г.Болормаа “Миний нөхөр уул уурхайд 10 гаруй жил ажилласан. Энэ уурхайд ажилд ороод таван сар болж байсан. 7-15 насны дөрвөн хүүхэдтэй. Манай нөхөр ажил хийж гэр бүлээ тэжээдэг байсан. Миний хувьд нуруу, бөөр өвддөг тул ажил хийх боломжгүй. Одоо бол үнэхээр хэцүү байна. Миний нөхрийг ажиллахгүй гэж байхад нь ажиллуулчхаад хэргээ хүлээхгүй, ар гэрийнхэнтэй нь уулзахгүй байгаад гомдолтой байна. Халамжаас тэжээгчээ алдсаны тэтгэмж гэж 261 мянган төгрөг тогтоосон.
Хэргийг шийдэж “Эрдэнийн хөгжил” ХХК-иас амиа алдсан гурван хүний үр хүүхдүүдийг нь 18 нас хүртэл нь асран хамгаалах, мөнгөн тэтгэмж олгоосой хэмээн хүсэж байна. Гурван эхнэр, есөн хүүхэдтэйгээ хэрхэн яаж амьдрахаа мэдэхгүй, хэцүү байна. Гурван хүүхэдтэйгээ үлдсэн эхнэрийн хувьд бие муутайгаас гадна нь хүүхэд нь байнгын эмчилгээнд хамрагддаг бөгөөд айлын хашаанд гэр түрээслэн амьдардаг. Хэцүү амьдралтай ядарсан хүмүүсийн хэргийг хууль хяналтын байгууллагууд үнэн мөнөөр шийдэж өгөхийг хүсэж байна” хэмээв.
