БСШУС-ын сайд Ё.Баатарбилэг цаг үеийн асуудлуудаар Төрийн ордонд мэдээлэл хийлээ

Тэрбээр,

"2018-2019 оны хичээлийн жил дуусч байна. Есдүгээр ангийг 43 000, 12-р ангийг 18 000 сурагч тус тус төгсөж байна. Энэ жил 80 гаруй их, дээд сургууль элсэлтээ авна. 1 сая хүүхэд боловсролын салбарт харьяалагдаж байна. 

240 000 хүүхэд цэцэрлэгт 

600 000 сурагч ЕБС-д 

160 000 оюутан их, дээд сургуульд 

100 000 багш, ажилтан энэ салбарт ажиллаж байна.

Нэг хүүхдэд үнэгүй боловсрол олгохын тулд 1.4 сая төгрөгийг жилд зарцуулдаг. Жилд төсвөөс 1.3-1.5 их наяд төгрөгийг шинээр сургууль, цэцэрлэг барих болон засварын ажилд зарцуулж байна.  

Нэг залруулга хийе. АТГ-аас 42 багшийг шалгаж байгаа гэсэн мэдээлэл тархсан байна. АТГ-аас үүнийг үгүйсгэсэн. Ийм асуудал байхгүй. Яг одоогоор АТГ-т анги засварын тав, арван цаас хурааж авсан гэх зургаан гомдол ирсэн юм билээ. Үүнийг нь хүлээж аваад, Нийслэлийн боловсролын газар руу шилжүүлдэг юм билээ. Түүнээс шалгаж байгаа зүйл байхгүй. Ер нь анги засвар болон бусад асуудлаар мөнгө хураах зүйл сургуулийн зүгээс байхгүй. Харин эцэг, эхчүүд өөрсдөө санал гаргаад, зөвлөлөөрөө хэлэлцэх бол нээлттэй. 

Хүүхдиийн хүчирхийллийн дийлэнх нь сургалтын бус орчинд үйлдэгдэж байна. Оны эхний дөрвөн сарын байдлаар цагдаагаас өгсөн мэдээллээр хүүхдийн эрх зөрчигдсөн 680 тохиолдлын 660 нь сургалтын бус орчинд үйлдэгдсэн байна. Тэгэхээр хүүхдийн эрх сургалтын орчин биш, сургалтын бус орчин их гарч байна. Энэ нь эцэг, эхчүүдийн анхаарал халамж тааруу байгааг харуулж байна.    

Иймд ирэх хичээлийн шинэ жилээс багш, сургааль, эцэг эхчүүд гурвалсан гэрээ байгуулж ажиллана. Хувийн сургуулиуд энэ гэрээг сайн хийдгийг та бүхэн мэднэ. Багш, сургуулийн үүрэг тодорхой байна. Гэтэл эцэг, эхчүүдийн үүрэг тодорхой биш байна. Хүүхдийнхээ дэвтэр, номонд анхаарахгүй байна, хичээлийн бус цагаар юу хийж байгаад нь санаа тавихгүй байна. Эцэг, эхийн хуралд суухгүй, ер нь бол сургууль, багшид даатгасан хэлбэртэй байгааг өөрчилнө" гэлээ. 

---