Исламын Бүгд найрамдах Афганистан улсад явагдаж буй НАТО-гийн цэргийн хүчний тэргүүлсэн “Шийдвэртэй дэмжлэг” олон улсын ажиллагаанд АНУ-ын Зэвсэгт хүчинтэй хамтран үүрэг гүйцэтгэх Монгол Улсын Зэвсэгт хүчний Цэргийн хамгаалалтын ротын VIII ээлжийн бие бүрэлдэхүүн өнөөдөр жанжин туганд хүндэтгэл үзүүллээ. Хил хамгаалах ерөнхий газар, төрийн тусгай хамгаалалтын газар, цэргийн ангийн нийт 113 албан хаагч тус ажиллагаанд оролцох гэнэ.

Олон үндэстний Маршал баазын аюулгүй байдлыг хангах үүргийг бусад орны цэргийн албан хаагчдын хамт үүрэг гүйцэтгэх наймдугаар ээлжийн бие бүрэлдэхүүний 60 хувь нь энхийг дэмжих ажиллагаанд 2-4 удаа оролцсон туршлагатай байгаа нь давуу тал юм.

Цэргийн багийн ахлагч, дэд хурандаа С.Бат-Эрдэнэ “Манай улсын бие бүрэлдэхүүн Афганистан улсын Кабул хотын төвийн шалган нэвтрүүлэх цэгт байрлан ажиллана. Шалган нэвтрүүлэх цэгт Монгол, АНУ, Их Британи, Дани улсын цэргүүдтэй зургаан сарын хугацаанд үүрэг гүйцэтгэнэ. Манай багийн бие бүрэлдэхүүний 60 хувь нь 18-30 насны албан хаагчид байгаа” хэмээв.

Манай улсын хувьд энхийн сахиулах ажиллагаанд 15 дахь жилдээ оролцож байгаа бөгөөд “Шийдвэртэй дэмжлэг” ажиллагаанд 2015 оноос оролцож эхэлсэн байна.

Үүрэг гүйцэтгэхээр явж буй Бодьхүүгийн аав Д.Баасанцэрэн “Миний бага хүү 017 ангид тавдахь жилдээ алба хаач байгаа бөгөөд анх удаа эх орноо хамгаалах ариун үйлсэд оролцохоор явж буйд баяртай байна. Энхийг сахиулах ажиллагаанд явснаар өргөсөн тангарагтаа үнэнч байж, ар гэртээ эдийн засгийн хувьд дэмжлэг болдог давуу талтай” хэмээв.

Ажиллагааны зорилго нь Афганистан улсын үндэсний аюулгүй байдлыг хангах хүчний үүрэг гүйцэтгэх чадавхийг нэмэгдүүлэх, сургах, дэмжлэг үзүүлэхэд тус тус оршиж байгаа ба энэхүү ажиллагаанд НАТО-гийн гишүүн болон түнш орнуудын цэргийн албан хаагчид үүрэг гүйцэтгэж байна. Энхийг сахиулах үйл ажиллагаанд нийт 16 мянга гаруй албан хаагч “зэвсэгтэй дипломатчны” үүрэг гүйцэтгэж, эх орныхоо нэр төрийг өндрөөс өндөрт өргөсөөр ирсэн билээ.

 

 

---