Монгол Улсын зөвлөх инженер Д.Батбаатар “ПетроЧайна Дачин Тамсаг Монгол” ХХK Монгол Улсын хууль, Олон улсын гэрээ хэлэлцээрийг зөрчиж байгаа асуудлаар өнөөдөр мэдээлэл хийлээ.

Монгол Улсын зөвлөх инженер Д.Батбаатар: 

-2019 оны нэгдүгээр сард гурван төрийн бус байгууллагаас надад хүсэлт гаргасан юм. Уг хүсэлтийн дагуу би “ПетроЧайна Дачин Тамсаг Монгол” ХХK-ийн үйл ажиллагаа явуулдаг 19, 21 дүгээр талбайд очиж ажиллахад маш ноцтой зөрчлүүд илэрлээ.
“ПетроЧайна Дачин Тамсаг Монгол” ХХK Монгол, БНХАУ-ын хооронд байгуулсан хэлэлцээрийг ноцтойгоор зөрчсөн байна. Өөрөөр хэлбэл, Засгийн газраас тусгай зөвшөөрөл авч оруулах ёстой байсан краныг зүгээр л жирийн машины зөвшөөрлөөр оруулж ирсэн байна.
Бид хууль бусаар оруулж ирсэн техник хэрэгслүүдээ яаралтай гарга гэж шаардахад “ПетроЧайна Дачин Тамсаг Монгол” ХХK-ийн хятадын төлөөлөгч "Танай хууль бидэнд үйлчлэхгүй. Манай толгой компаниас биднийг гар гэвэл гарна" гэж хэлсэн.
Мөн "Та нар талбайдаа монгол залуусыг ажиллуул" гэдэг санал тавихад "Үгүй" гэж хариулж байна. "Хэрвээ ажиллуулбал зөвхөн хог цэвэрлүүлэх ажил л хийлгэнэ" гэж хэлсэн. Монгол Улсад хэрвээ төр гэж байдаг бол арга хэмжээ аваач ээ хэмээн хүсч байна.
Авто тээврийн үндэсний төвийн дэд захирал Ш.Батсайханаас “ПетроЧайна Дачин Тамсаг Монгол” ХХK-д хууль бусаар оруулж ирсэн кранаа гарга гэсэн бичиг явуулахаар крануудаа хил дээр аваачиж орхичихоод өөрсдөө явчихдаг. Харин техникээ гаргадаггүй. Тэгж байснаа тэр техникүүдээ буцааж оруулдаг ийм л байдалтай байгаад байна. Онцгой зөвшөөрлөөр оруулж ирэх ёстой техник хэрэгслийг ердийн зөвшөөрлөөр оруулж монголын хуулийг зөрчсөөр байна” гэв.
-“ПетроЧайна Дачин Тамсаг Монгол” ХХK-д хэчнээн монгол хүн ажиллаж байгаа вэ?
-Энэ компанид туслан гүйцэтгэгч монгол компани байхгүй. Харин туслан гүйцэтгэгчийн туслан гүйцэтгэгчээр ганц нэг монгол компани ажиллаж байна. Монголчуудын хийж чаддаг маш олон ажил байсаар байхад огтоос ажиллуулахгүй байна. Бүгдэд нь хятад хүнийг өндөр цалинтайгаар ажиллуулж байна.
-Та бүхний тавьж байгаа гол шаардлага юу вэ?
-Бид үйл ажиллагааг нь гацаах зогсоох гээгүй. Ажлаа хэвийн үргэлжлүүлэг. Гэхдээ монголчуудын хийж чадах, нарийн мэргэжил шаардахгүй ажилд монголчуудыг олноор нь ажиллуулж өгөөч ээ л гэж хүсч байгаа. Мөн хууль бусаар оруулж ирсэн техникүүдийг нь гаргаж, монгол компаниудын техник хэрэгслүүдийг тус талбайд ажиллуулахыг шаардаж байгаа.

---