Засгийн газрын нэг сайд 10 сая долларын авлига авсан гэх мэдээлэл гараад багагүй хугацаа өнгөрч буй. Энэ асуудалтай холбоотойгоор УИХ-ын гишүүн, ХЗДХ-ийн сайд Ц.Нямдоржоор ахлуулсан ажлын хэсэг гарч шалгалт явуулж байгаа юм.

Харин өнөөдөр /2019.06.06/-ийн УИХ-ын чуулганы нэгдсэн хуралдаан дээр уг асуудал хөндөгдөж ХЗДХ-ийн сайд Ц.Нямдорж "10 сая долларын авлигатай холбоотой ямар ч асуудал хууль хяналтын байгууллага дээр ирээгүй, энэ асуудлыг гаргаж тавьсан хүн нь ч нотлох гэж ирээгүй. Тиймээс энэ бол худал явуулга" хэмээн мэдэгдсэн юм. Мөн тэрээр Ерөнхийлөгч байсан хүмүүсийн хэвлэлийн албанаас ийм худал яриа гарч, түүндээ огт хариуцлага хүлээдэггүй гэдгийг онцолсон юм. 

Түүнчлэн энэ удаагийн чуулган дээр "Засгийн газрын нэг сайд Францийн компаниас 1,2 сая долларын авлига авсан. Түүнийг нь Франц улсад шалгаж байна" гэх асуудлыг ч хөндлөө. Энэ талаар ЗГХЭГ-ын дарга Л.Оюун-Эрдэнэ " Тэр 1,2 сая долларын авлигатай холбогдсон хүн бол өмнөх Засгийн газрын үед ажиллаж байсан дэд сайд О.Эрдэнэбулган" гэж мэдэгдлээ. 

Түүний хэлснээр, Уул уурхайн дэд сайдаар ажиллаж байсан О.Эрдэнэбулган Францийн компаниас 1,2 сая долларын авлига авсан болж таарч байна.

Түүнийг өнгөрсөн онд Үнэ тогтворжуулах хөтөлбөртэй холбоотой асуудлаар АТГ-аас шалгаж, түр саатуулж байсан ч суллаад гаргасан байдаг. Дэд сайд асан О.Эрдэнэбулган ч энэ талаараа цахим хуудастаа "намайг шалгаад юу ч олж долоохгүй, би ямар ч асуудалгүй" гэх утгатай мэдэгдэл хийж байсан юм. Харин энэ удаад дахин шалгаж байгаа эсэх нь тодорхойгүй байна. 

---