Туркийн дипломат дугаартай автомашинтай хоёр дипломат ажилтан 3 сая ам.доллараар үнэлэгдэх, 70 кг хар тамхи тээвэрлэж байгаад 5 сарын 3-нд ХНБГУ-ын Дрезден хотод саатуулагдсан талаар хэвлэлүүд мэдээлсэн. Тэднийг Чех-Германы хилийн ойролцоо А17 дугаар хурдны зам дээр 2014 оны Мерседес Бенц И класс маркийн машинтай явж байхад нь замын цагдаа нар зогсоон шалгажээ. 

 

БНТУ-д манай хоёр дипломат байгууллага үйл ажиллагаа явуулдаг. Нэг нь, Анкара дахь ЭСЯ бөгөөд Элчин сайдаар Равдангийн Болд ажилладаг. Нөгөө нь, Истанбул дахь Ерөнхий консулын газар (цаашид ЕКГ) бөгөөд Ерөнхий консулаар Энэбишийн Мөнх-Очир ажилладаг. Элчин сайд Р.Болдын томилолтын хугацаа энэ жил дуусаж байгаа бол Ерөнхий консул Э.Мөнх-Очир энэ хавар бүрмөсөн эгэж иржээ. 

Баттай эх сурвалжийн авсан мэдээллээр эдгээр хоёр дипломат ажилтнууд нь Истанбул дахь ЕКГ-ын ажилтнууд байжээ. Ерөнхий консулыг Гадаад харилцааны сайд шууд томилдог. Гадаад харилцааны сайд Д.Цогтбаатар тус албан тушаалд хүн томилохгүй удсанаас "эзэнгүй" болсон дипломат ажилтнууд дураараа дургиж, дунд чөмгөөрөө жиргэсэн нь энэхүү 3 сая ам.доллараар үнэлэгдэх хар тамхины хэрэг бололтой. 

Хар тамхи тээвэрлэж яваад баригдсан Э-гийн хувьд ЕКГ-ын консул Б.Энхмөнх гэсэн мэдээлэл байна. Харин нөгөө хүний хувьд Гадаад харилцааны сайд Д.Цогтбаатарын жолоочоор ажиллаж байсан Б гэсэн мэдээлэл байгааг манай сэтгүүлч эргэн та бүхэнд тодруулж мэдээлэх болно. 

Foto: Zollfahndungsamt Dresden

---