“Зүүн хойд Азийн аюулгүй байдлын асуудлаарх Улаанбаатарын яриа хэлэлцээ” олон улсын зургаадугаар бага хурал өнөөдөр эхэллээ. Гадаад харилцааны яам, Стратеги судалгааны хүрээлэнгээс хамтран зохион байгуулж буй энэ хуралд Монгол, ОХУ, БНХАУ, БНСУ, Япон зэрэг бүс нутгийн орнуудаас гадна АНУ, ХБНГУ, Канад, Норвеги, Франц зэрэг түнш орнуудын 200 гаруй зочид төлөөлөгчид оролцож байна.

Яриа хэлэлцээрийн замаар Солонгосын хойгийг цөмийн зэвсгээс ангижруулах, бүс нутгийн бусад асуудлуудыг хэлэлцэн шийдвэрлэх зорилгоор 6 жилийн өмнө санаачлан эхлүүлсэн энэ санаачилга бүс нутгийн аюулгүй байдал төдийгүй, эрчим хүч, дэд бүтэц, хүрээлэн буй орчин, хүний аюулгүй байдал зэрэг асуудлыг хэлэлцдэг чухал талбар болж өргөжжээ.

НҮБ-ын Улс төр, энхийг цогцлоох газрын дарга Т.Питер

“3үүн хойд Азийн аюулгүй байдлын асуудлаарх Улаанбаатарын яриа хэлэлцээ бага хурал хэдийгээр зургаа дахь удаагаа зохион байгуулагдаж байгаа хэдий ч миний бие анх удаагаа оролцож байна. Монгол Улс зүүн хойд Азийн аюулгүй байдлыг хангах чиглэлээр санал санаачилга гаргаж, идэвхтэй ажиллаж байгаад талархалтай ханддаг. Түүнчлэн Монгол Улс бүс нутагтаа төдийгүй олон улсын тавцанд явуулж байгаа энхийг сахиулах бодлого цар хүрээгээр дэлхий дахинд танигдсаны зэрэгцээ бусад улс орны хүндэтгэлийг хүлээж байдаг гэдгийг хэлмээр байна” гэсэн юм.

Монгол Улсын Ерөнхийлөгч Х.Баттулга Улаанбаатарын яриа хэлэлцээ олон улсын зургаадугаар бага хуралд хүргүүлсэн илгээлтдээ

“Энэ удаагийн бүс нутгийн хурлаар улс төр, аюулгүй байдлын төлөв, сорилтуудыг хэлэлцэхийн зэрэгцээ Зүүн хойд Азийн эрчим хүчний хамтын ажиллагааг хөгжүүлэхэд түлхүү анхаарч байгааг тэмдэглүүштэй. Азийн хөгжлийн банктай хамтран хийсэн судалгаагаар Монгол Улс 200 гигабитт салхины эрчим хүч, 1.2 тераватт нарны эрчим хүчийг үйлдвэрлэж хөрш орнууддаа экспортлох боломжтойг тогтоосон. Бүс нутгийн эрчим хүчний шинэ дэвшилтэт зах зээлийг бий болгоход бүс нутгийн орнуудын Засгийн газруудын дэмжлэг, нэгдмэл байр суурь нэн чухал” гэдгийг онцоллоо.

---