Г.Занданшатар УИХ-ын дарга болсны дараахан УИХ-ын Тамгын газрын Ерөнхий нарийн бичгийн дарга Ц.Цолмон ажлаа өгсөн билээ.  УИХ-ын Тамгын газрын ЕНБД Ц.Цолмон өнгөрсөн 05-р сарын 07-ны өдөр ажлаа өгөхдөө өөрийн хүсэлтээр ажлаа өгөөгүй, “дээрээс” шахалт үзүүлсэн болохыг хуульч, доктор Б.Гүнбилэг илчилжээ. 

Доктор Б.Гүнбилэгийн хэвлэлд өгсөн ярилцлагадаа “УИХ-ын дарга шинээр томилогдоод Их хурлын Тамгын газрын Ерөнхий нарийн бичгийн дарга Ц.Цолмонтой уулзаад “би өөртэй чинь хамтарч ажиллах боломжгүй. Ажлаа өгөөрэй” гэдэг санал тавьсан байгаа юм” гэдгийг онцолжээ. Тийм учраас тэрээр төрийн жинхэнэ албан хаагчид шахалт үзүүлж ажлаас нь чөлөөлсөн гэх үндэслэлээр Үндсэн хуулийн цэцэд хандахаар болжээ.

Учир нь энэ оны нэгдүгээр сарын 1-нээс шинээр хэрэгжиж эхэлсэн Төрийн албаны тухай хуулийн 7.1.2 дээр төрийн алба хаагч мэргэшсэн, тогтвортой байх зарчмыг зааж, улс төрөөс хараат бус байхыг заасан байдаг. Энэ зарчмыг УИХ-ын дарга алдагдуулсан гэж үзсэн байна.

 

---