Умард солонгосын удирдагч Ким Жон Уны баруун гар гэгддэг Ким Ён Чолийг дахин хүмүүжүүлэх хорих лагерь луу илгээсэн тухай өнгөрсөн баасан гарагт хэвлэл мэдээллийн хэрэгслүүдээр дамжуулжээ. Хорих лагерьт байгаа гэж мэдээлсэн Ким Ён Чоль өчигдөр буюу ням гарагт бусад албан тушаалтнуудын хамт урлагийн арга хэмжээнд оролцсоныг Умард Солонгосын хэвлэлээр мэдээлсэн байна.

Ким Ён Чоль нь өнгөрсөн нэгдүгээр сард АНУ-д очиж Ким Жон Ун, Дональд Трамп нарын хоёр дахь удаагийн дээд хэмжээний уулзалтын бэлтгэл ажлыг базаалцсан юм. Барууны хэвлэл мэдээллийн хэрэгслүүд түүнийг хорих лагерь луу илгээсэн гэх мэдээлэл дамжуулсан нь ор үндэслэлгүй худлаа байжээ.

 

Түүнчлэн АНУ дахь Умард Солонгосын төлөөлөгчөөр ажиллаж байсан Ким Хёк Чолийг Пхеньяны нисэх буудалд цаазаар авсан гэх мэдээллийг өнгөрсөн баасан гарагт дамжуулсан юм. Тэрээр Вьетнамд болсон дээд хэмжээний уулзалтыг зохион байгуулсан гол хүмүүсийн нэг ажээ.  Ням гарагийн урлагийн арга хэмжээн дээр Ким Хёк Чоль зочдын дунд байгаагүй ч түүнийг шийтгэж цаазаар авсан эсэх нь тодорхойгүй хэвээр үлдэж байна.

Өрнөдийн болон Өмнөд Солонгосын хэвлэл мэдээллийн хэрэгсэл, Засгийн газрууд Умард Солонгосын удирдагчийг цэвэрлэгээ хийж цусаа сэлгэж байгаа тухай мэдээлдэг ч цаазаар авсан гэх албан тушаалтнууд хожим эсэн мэнд залуу удирдагчийн хажууд шадарласан хэвээр байдаг. Умард Солонгосын дуучин Хеон Сонг Волыг 2013 онд буудуулж амиа алдсан тухай мэдээлж байсан ч тэрээр 2018 онд эсэн мэнд төдийгүй Умард Солонгосын төлөөлөгчдийн хамт Өвлийн Олимпын наадмыг зорьж Сөүлд ирсэн тохиолдол бий.

 

Эх сурвалж: www.bbc.com

---