БНСУ-ын жуулчдыг Будапешт хотын дундуур урсах Дунай мөрнөөр аялуулж байсан завь өөр нэг усан онгоцтой мөргөлдөж тус улсын долоон иргэн амиа алдсан нь баттай болсон. Усан онгоцтой хамт живсэн 21 иргэнийг эрж хайх ажил үргэлжилсээр байгаа ч тэднийг амьд мэнд олох найдвар бараг тасарч байна.

Осол орон нутгийн цагаар лхагва гарагт болсон. Завь ослоос ердөө долоон секундын дараа живсэн. Украйн улсын эрх баригчид живсэн завийг мөргөсөн усан онгоцны ахмад 64 настай этгээдийг хариуцлага алдаж олон арван хүний амь насанд хүрсэн хэрэгт буруутган сэжигтнээр баривчлан саатуулжээ.

Дунай мөрөнд аялагч жуулчдад зориулсан усан онгоц, завь их байдаг ч ихэвчлэн аюулгүй зорчдог тул осол аваар гарах нь тун ховор юм. Энэ удаагийн ослыг гэмт хэргийн сэдэлтэй гэж үзэн мөрдөн шалгах ажлыг эхлүүлжээ.

 

 

Өмнөд Солонгос улсын Засгийн газар олон тооны иргэдээ алдсан учир албаны төлөөлөгчдөө Будапешт руу илгээсэн. Тус улсын хэвлэл мэдээллийн хэрэгслүүдийн дамжуулж байгаагаар Дунай мөрний аяллыг зохион байгуулсан аялал жуулчлалын компанийг аюулгүй байдлыг хамгаалах наад захын дүрэм баримтлаагүйд буруутгаж байна гэжээ.

Хяналтын камерын бичлэгт Лусын дагина нэртэй Солонгосын жуулчдыг тээвэрлэж байсан завь араасаа Викинг Сигин усан онгоцоор мөргүүлсэн байна. Осол лхагва гарагийн үдэш 21 цагт Маргарет гүүрний оролцоо болжээ. Том усан онгоц дээр байсан Америкийн жуулчны ярьснаар бүх зүйл нүдэн дээр нь маш хурдан болж өнгөрсөн байна.

 

 

Лусын дагина дээр Өмнөд Солонгосоос ирсэн 30 жуулчин, гурван хөтөч, хөлгийн багийн хоёр гишүүн байжээ. Жуулчдын ихэнх нь 40-50 насныхан ба зургаан настай нэг хүүхэд, 70 настай ахмад дунд нь байсан гэж Ёнхап агентлаг мэдээлэв. БНСУ-ын Гадаад хэргийн яамны мэдээгээр амиа алдсан нь баттай болсон долоон иргэн аврах хантаазгүй байсан ба эдгээр зорчигчдын төрөл төрөгсөд Унгарыг зорьжээ.

Тус улсын Ерөнхийлөгч Мүн Жэ Ин Унгарын Засгийн газартай хамтран ажиллаж ослын шалтгааныг тодруулахаа амлав. 2014 онд Жиндо арлын орчимд Севол хөлөг онгоц живж 304 хүн амиа алдсаны ихэнх нь сургуулийн сурагчид байсан нь Өмнөд Солонгосын ард иргэдийн сэтгэлд гүн сорви үлдээсэн юм.

 

 

Эх сурвалж: www.bbc.com

---