Шатахууны худалдаа эрхлэгчид автобензин, дизель түлшний жижиглэн борлуулалтын үнийг удаа дараалан нэмэгдүүлсэнтэй холбогдуулан Шударга өрсөлдөөн, хэрэглэгчийн төлөө  газар/ШӨХТГ/-аас шалгалт хийжээ.  Шалгалтыг шатахууны худалдаа эрхлэгч томоохон 17 аж ахуйн нэгжүүдээс авсан байна. Шалгалтаар Шатахуун түгээх станцууд үнийг шалтгаангүй нэмснийг тогтоожээ.

Шалгалтыг өнгөрсөн 03-р сарын үнийг одоо байгаа үнэ болон ОХУ-ын үнэтэй харьцуулан гаргажээ.

2019 оны 3 дугаар сарын 26-ны улсын дундаж үнэ:

-А-80 автобензин 1763 төгрөг/литр,

- Аи-92 автобензин 1819 төгрөг/литр,

-Дизель түлш 2348 төгрөг/литр байсан ч

2019 оны 5 дугаар сарын 28-ны байдлаар улсын дундаж үнэ:

-А-80 автобензин 1875 төгрөг/литр,

- Аи-92 автобензин 1980 төгрөг/литр,

-Дизель түлш 2445 төгрөг/литр болж төрөл тус бүр дээр 97-161 төгрөгөөр өссөн байна.

Харин 2019 оны 4 дүгээр сард ОХУ-ын “Роснефть” компанийн хилийн үнэ:

-А-80 автобензин 613 ам. доллар/тн,

-АИ-92 автобензин 643 ам.доллар/тн,

-Дизель түлш 623 ам.доллар/тн байсан бөгөөд

2019 оны 5 дугаар сарын хилийн үнэ:

-А-80 автобензин 665 ам. доллар/тн,

-АИ-92 автобензин 695 ам.доллар/тн,

-Дизель түлш 640 ам.доллар/тн болж өмнөх сартай харьцуулахад тонн тутамдаа 17-52  ам.доллар-аар өсчээ.

Дээрх харьцуулалтаас үзэхэд гадаад хилийн үнэ өссөн ч жижиглэн борлуулалтын үнийг 97-161 төгрөгөөр нэмэгдүүлэх нөхцөл үүсээгүй байна гэж үзжээ.

Мөн ШТС-уудын үйл ажиллагааны зардлыг хянаж үзэхэд Аи-92 автобензин литр тутамдаа дунджаар 30-100, дизель түлш литр тутамдаа дунджаар 270-289 төгрөгийн ашигтай байхад жижиглэн борлуулалтын үнийг нэмэгдүүлсэн нь тогтоогдсон байна.

Гэвч,

Газрын тосны бүтээгдэхүүний зах зээлийн хувьд 2019 оны байдлаар зүй ёсны монополь байдалтай аж ахуй эрхлэгч тогтоогдоогүй учраас ШӨХТГ-аас шатахууны үнийг шууд хянах эрх хуулиар олгогдоогүй байна. Өөрөөр хэлбэл, ШТС-ууд үнээ шалтгаангүйгээр нэмсэн нь тогтоосон ч түүнийг хэрхэн зохицуулах эрх нь ШӨХТГ-т байхгүй гэсэн үг. /Хуулиндаа ШӨХТГ нь зөвхөн зүй ёсны монополь байдалтай аж ахуй эрхлэгчийг судлан тогтоож, зах зээлд нийлүүлж байгаа бараа, бүтээгдэхүүний үнийг хянаж, зохицуулалт хийдэг /

Тиймээс шатахууны үнийн өсөлттэй холбоотой асуудалд салбар хариуцсан яам, агентлагаас дараах арга хэмжээ авч ажиллах саналыг Ерөнхий сайд, Шадар сайд, ЗГХЭГ-ын дарга нарт хүргүүлжээ.

 

---