Дорноговь аймгийн Замын-Үүдийн “Өртөө-2” гэдэг газарт төмөр замын ажилтан Б гэгч 2018 оны наймдугаар сарын 27-нд ажлаа хийж явахдаа вагонд дайруулж амиа алдсан байдаг юм. Талийгаачийн хамгийн сүүлд ажлаа хийгээд явж байгаа бичлэг цахим орчинд цацагдсан бөгөөд бичлэгт залуу хүрз бариад замын хажуу талыг цэвэрлэж байдаг. Гэнэтхэн вагон орж ирэхэд замын хажуу руу бултах гэсэн ч амжилгүй дайруулж буй бичлэг байдаг билээ. Гэтэл энэхүү хэргийг прокурорын байгууллагаас “амиа хорлолт” буюу гадны нөлөөгүй хэмээн хаажээ.

Хэргийг үнэн мөнөөр шийдэхгүйгээс гадна талийгаач дүүгийг нь “согтуу байсан, амиа хорлосон” гэх тайлбарыг УБТЗ-ын ХНН-ын дарга Д.Жигжиднямаа ярьсанд талийгаачийн ах Ш.Лувсанцэрэн туйлын гомдолтой буйгаа илэрхийлэн өнөөдөр УБТЗ-ын Удирдах байрны гадна лоозон барин зогссон юм. Түүнийг удалгүй тус газрын нэгэн албан тушаалтан хүлээн авч уулзан удахгүй удирдлагуудтайгаа уулзуулах болно гэсэн хариуг хэлсэн байна. Ингээд бид түүнтэй хэсэг хором ярилцсан юм.

-Таны хувьд өнөөдөр УБТЗ-ын удирдлагуудад ямар шаардлага хүргүүлэхээр ирсэн бэ?

-Ажлаа хийж байсан хүнийг өөрийнх нь буруутай үйлдлээс болж амиа алдсан гэх дүгнэлт гаргасан байна лээ. Д.Жигжиднямаа дарга талийгаачийн ар гэрээс уучлалт гуйхын оронд “Талийгаач өөрөө вагоны урдуур орчихсон. Тухайн үед согтуу байсан юм билээ” гэсэн тайлбар өгсөн нь хүний нэр төрд халдаж байна. Өмнө нь удаа дараа уулзахаар ирэхэд Д.Жигжиднямаа дарга хүлээн аваагүй. Иймээс өнөөдөр би Орос удирдлагуудтай нь уулзах гэж ирсэн.

Гэвч дараа нь хүлээн авч уулзахаар боллоо. Бид ямар мөнгө төгрөг нэхэж байгаа биш хүнээ алдчихаад ядаж явахад дээрээс нь хэвлэл мэдээллээр хүний нэр төрд халдан, хэрэг нь ингэж хаагдаж буйд гомдолтой байна.

-Тухайн үед болсон явдлыг хэлбэл?

-Манай дүү 29 настай өртөөний холбооны механикчаар ажилд ороод удаагүй байсан. Тухайн үед Олон улсын вагон 12 минутаар хоцорч ирж байгааг мэдээгүй бөгөөд мэдсэн бол сонор сэрэмжтэй ажиллах байсан. Амиа хорлох гэж байгаа хүн вагоноос бултах байсан уу. УБТЗ-ын ХНН-ын дарга Д.Жигжиднямаа даргатай уулзах юм бол нэг зүйл асууя гэж бодож байгаа “Яагаад миний дүүг воганы урдуур яваад амиа хорлосон” гэж байгаа юм гэдгийг. УБТЗ-ын удирдлагуудаас нэр төрийг нь цэвэр үлдээгээч хэмээн хүсэж байна.

---