Улаанбаатар хотын хамгийн их хүн амтай Баянзүрх дүүрэгт 130 мянган гаруй хүүхэд амьдарч байна. Тус дүүргийн хувьд төрөлжсөн хүүхдийн эмнэлэг байдаггүй. Тэгвэл өнөөдөр Баянзүрх дүүргийн 9 дүгээр хороонд БНХАУ-ын Энтайван хөгжлийн сангийн дэмжлэгээр баригдсан 50 хүүхдийн ортой, 650 мянган ам.долларын хөрөнгө оруулалтаар бүрэн тоноглогдсон хүүхдийн эмнэлэг ашиглалтад орж, нээлтээ хийлээ.

Нээлтийн үеэр БНХАУ-ын “Энхтайван Хөгжлийн Сан”-гаас тус эмнэлэгт 150,000 ам.долларын өртөг бүхий эмнэлгийн тоног төхөөрөмж хүлээлгэн өгөв. БНХАУ-ын хөрөнгө оруулалтаар хүүхдийн эмнэлэг барихаас гадна 25 нэр төрлийн тоног төхөөрөмж, ширээ сандал гээд бүх зүйлээр хангаж өгсөн байна.

Энэхүү үйл ажиллагаанд МАН-ын Ерөнхий Нарийн Бичгийн Дарга, НИТХ-ын төлөөлөгч Д.Амарбаясгалан, НЗД бөгөөд УБ хотын захирагч С.Амарсайхан, БНХАУ-ын Элчин Сайд Шин Хаймин, БНХАУ-ын ХКН-ын Гадаад Хэргийн Дэд Сайд Ван Яжун, БНХАУ-ын Энх Тайван Хөгжлийн Сангийн НБД Ван Хуа, БНХАУ-ын Чайнолка-ийн Гүйцэтгэх Захирал Хи Жихуи, нийслэлийн ЭМГ-ын дарга Л.Төмөрбаатар нарын хүндэт зочид оролцлоо.

Тус эмнэлгийн дарга Б.Анхтуяа “Баянзүрх дүүргийн 9, 17, 23, 24, 28 дугаар хорооны 18 мянга гаруй хүүхэд хэвтэн эмчлүүлэх, бүрэн боломжтой боллоо. Манай эмнэлгийн хувьд шүдний кабинет, эхо, сэхээний тасагтай, нярайн шарлагын фото аппарат зэрэг бусад шаардлагатай тоног төхөөрөмжөөр бүрэн хангагдсан. Мэргэжлийн эмч, сувилагч гээд нийт 28 хүний бүрэлдэхүүнтэйгээр ирэх сарын 15-наас хүүхдэд үйлчилж эхэлнэ” гэлээ.

 Баянзүрх дүүргээс сонгогдсон НИТХ-ын төлөөлөгч Д.Амарбаясгалан “БНХАУ-ын Энх Тайван Хөгжлийн Сан болон "Хангарьд Улаанбаатар" ТББ-тай хамтран урьд нь Чингэлтэй, Налайх дүүрэгт хүүхдийн эмнэлэг, Төв аймаг хүүхдийн цэцэрлэг барьж өгч байсан. Цаашид тус эмнэлгийн үйл ажиллагааг авч авахад улс, нийслэлийн төсвөөс хөрөнгө гарган ажиллаж байгаа. Шар хад орчмын хүүхдүүд хол явалгүйгээр эмнэлгийн бүрэн үйлчилгээг авах болсонд энэ тойргоос сонгогдсон төлөөлөгчийн хувьд баяртай байна” гэлээ.

 

---