Зайсан орчимд амьдардаг иргэд Байгаль орчин, аялал жуулчлалын сайд Н.Цэрэнбатыг огцрохыг шаардан өнөөдөр тус яамны гадаа жагслаа.

Тэдний зүгээс “Богд Хан уулын дархан цаазат газрын хамгаалалтын захиргаанаас бүх материалыг нь бүрдүүлж өгсөн байхад газар нь давхцаагүй 31 айлын гэрчилгээг олгохгүй, давхцалтай 89 айлыг ч судалж өгөхгүй байна. Сүүлд давхцалгүй бөгөөд гэрчилгээтэй байсан айлын газрыг ч цуцалсан. Иргэд бидэнд хүндэтгэлгүй хандаж байна, асуудлыг шийдэж өгөхөд анхаарал тавьдаггүй, хүлээн авч ч уулздаггүй. Яагаад гэдэг учир шалтгаанаа ч хэлэхгүй байна" хэмээн дурдаж байлаа.

Түүнчлэн Хан-Уул дүүргийн 11-р хороо, Зайсан толгойн зүүн талд иргэн О.Одсүрэн нь 2018 онд эрх бүхий байгууллагын зөвшөөрөлгүйгээр барилгын суурийн газар шорооны ажил явуулж, Тусгай хамгаалалттай газар нутагт хориглосон үйл ажиллагаа явуулсан үйлдэл гаргасан.  Энэ асуудалд Богдхан уулсын дархан цаазат газрын хамгаалалтын захиргааны зүгээс ухаж болохгүй гэсэн шаардлага тавьсан ч уг шаардлагыг иргэн О.Одсүрэн хүлээж авахгүй байгаа тул өдий хүртэл Зайсангийн иргэд тэмцэж байгаа юм. 

Энэ мэт Зайсанд амьдарч байгаа иргэдийн газрын асуудлыг шийдээгүй байж, компаниудад газар олгож байгааг хянаж үзмээр байна хэмээн шаардаж байлаа.

 

 

---