Урин дулааны улирал эхэлсэнтэйгээр холбоотойгоор иргэд Туул голын эрэг дагуу ихээр амарцгаадаг. Гэвч зарим ёс суртахуунгүй хүмүүс Туул голд автомашинаа угаах, голын ус руу автомашины оруулж зогсоох зэрэг зохисгүй үйлдлийг гаргасаар байна. Тухайлбал, 79-32 УНЯ улсын дугаартай автомашин бүхий иргэд энэ сарын 22-ны өдөр 13 цагийн үед Богдхан уулын арын зам дагуу байрлах “Хийморь” хотхоны эсрэг талд Туул гол руу автомашинаа оруулж, байгаль орчныг бохирдуулж байгааг та бүхэн харж байна. Туул голын энэ хэсэг маш шигүү бургастай. Тэгэхээр эдгээр хүмүүс автомашинаа Туул голын энэ хэсэгт оруулахын тулд цөөнгүй бургас, бут сөөгийг машинаараа дайрч, хугалж гэмтээсэн байж болзошгүй байна.

Улаанбаатар хотын агаарыг чийгшүүлж, иргэдийг ундаалдаг, хатан Туул голоо хайрлаж хамгаалах нь энэ хотод амьдардаг иргэн бүрийн үүрэг юм. Иймд зохисгүй үйлдэл гаргаж байгаа иргэдийн зүй бус үйлдлийг зураг дүрсээр баримтжуулан холбогдох байгууллагад мэдээлж байхыг иргэддээ уриалж байна.

---