Гитар гэхээр эрхгүй хөгжмийн зэмсэг санаанд бууж байгаа ч ийм хэлбэртэй тансаг зэрэглэлийн зочид буудал удахгүй нээлтээ хийх ажээ.  АНУ-ын өмнөд Флоридагийн Холливудад Hard Rock зочид буудал, казиногийн цогцолбор ирэх 10 дугаар сарын 24-ний өдөр нээлтээ хийх юм байна.

Та бидний танил гитарын хэлбэртэй зочид буудал дэлхийд анхдагч гэдгийг CNN дамжуулав. Уг зочид буудлыг 1,5 тэрбум ам.долларын төслөөр бүтээн байгуулж байна. Холливуд дахь Hard Rock зочид буудал, казиногийн цогцолбор үзэсгэлэнт далайн эрэг, ая тухтай амарч зугаалан дэлгүүр хэсэх боломжийг зочиддоо олгох юм.

 

 

120 гаруй метр өндөр аварга гитарын хэлбэртэй зочид буудал ирэх долдугаар сарын 24-ний өдрөөс онлайн захиалгаа авч эхэлнэ. Нээлтийн арга хэмжээг алдарт Maroon 5 хамтлагийн тоглолтоор хийх ба тасалбарыг нь худалдаанд гаргажээ.

Hard Rock international компанийн захирал Жим Аллены хэлснээр шинээр зочид буудал нээхээс гадна Тампад өргөтгөл хийснээр үйл ажиллагааныхаа цар хүрээг өмнө байгаагүй өргөн хүрээгээр тэлж байна гэжээ. 1971 онд байгуулагдсанаасаа хойш 74 улсад салбараа нээсэн Hard Rock  сүлжээг хөгжимгүйгээр төсөөлөх аргагүй.

Мөн автомат тоглоомын 3,000 машин, 228 казиногийн ширээ, театр, 14 зоогийн газар, үзэсгэлэнт усан сангууд гитарын хэлбэртэй харшид зочдыг угтах юм байна. Зочид буудлын үнийг одоогоор олон нийтэд ил болгоогүй.

 

 

Эх сурвалж: www.cnn.com

---