Монгол Улсын анхны Замын хөдөлгөөний дүрмийг баталсны 94 жилийн ойн өдрийг тохиолдуулан Тээврийн цагдаагийн албанаас “Бяцхан зорчигч” аян, Нээлттэй хаалганы өдөрлөгийг маргааш зохион байгуулахаар болсон талаараа мэдээлэл хийлээ.

Тээврийн цагдаагийн албаны Урьдчилан сэргийлэх хэлтсийн дарга, хурандаа Э.Бөхбат “Монгол Улсад хүний амь нас аврах зорилготой замын хөдөлгөөний дүрэм батлагдсан ойн өдрийг тохиолдуулан хийх гэж буй ажлын талаар мэдээлэл өгье.

 

Замын хөдөлгөөний дүрмийг баталсан өдрийг тохиолдуулан бид Жанжин Сүхбаатарын талбай дээрээ нийт иргэдтэйгээ хамт нээлттэй хаалганы өдрийг зохион байгуулна.
Нээлттэй хаалганы өдөр 11.00-16.00 цагийн хооронд жолооны эрх сэргээх шалгалт авах, жолоодох эрхийн үнэмлэхийг шинээр болон дахин олгох, хаяж гээгдүүлсэн үнэмлэхийг дахин олгох, эрхээ хасуулсан иргэдийн эрхийг сэргээх зөвлөгөө мэдээлэл өгөх, автомашины дугаарын давхцалыг шалгах, албан журмын даатгал, бүх төрлийн лавлагаа мэдээлэл гэх мэт төрөөс үзүүлдэг бүх үйлчилгээг нэг дор түргэн шуурхай үзүүлнэ” гэв.

 

Тээврийн цагдаагийн албаны Техник замын хяналтын хэлтсийн дарга, цагдаагийн хурандаа Ч.Жаргалсайхан “Манай улсын иргэд зам тээврийн осолд маш ихээр өртөж байна. 100 мянган хүнд ногдох нас баралтаар дэлхийд нэлээн хойгуур Африкийн орнуудтай ойролцоо явж байна. Гэтэл дэлхий дахин авто ослыг маш ихээр бууруулж чадсан. Нэг ч хүүхдээ авто ослоор эндүүлдэггүй улс орон олон болсон. Нэг ч иргэнээ авто осолд өртүүлдэггүй орнуудын тоо өсч байна” гэсэн юм.

Монгол Улсын Үндэсний аюулгүй байдлын зөвлөлөөс 2031 он гэхэд авто ослын тоог 50 хувиар бууруулна. Хамгийн сүүлийн үеийн зам тээврийн хяналтын төхөөрөмжийг 50 хувиар нэмэгдүүлнэ гэх мэт том зорилтыг тавьжээ. Энэ зорилтдоо хүрэхийн тулд маш олон ажлыг хэрэгжүүлэн ажиллаж байгаа аж.
Ташрамд хэлэхэд 1925 оны тавдугаар сарын 22-ны өдрийн Засгийн газрын 18 дугаар хуралдаанаар хамгийн анхны Замын хөдөлгөөний дүрмээ баталж байжээ.

---