Халуун орны бүсэд ургадаг дуриан жимс ихүүн, өмхий үнэртэй тул олон нийтийн зарим газарт авч орохыг хориглосон байдаг. Австралийн Канберра хотын их сургуулийн номын санд хаа саагүй хий мэт эвгүй үнэр тархаасан дуриан жимсийг олж хаяхад гал сөнөөгчид, аврах албаныхан тусалжээ.

Канберрагийн их сургуулийн номын санд хийн хүчтэй үнэр гарч байгаа тухай дуудлага гал сөнөөгчид, аврах ангийнханд ирсэн байна. Номын сангийн үйлчлүүлэгчид, уншигчдыг нүүлгэн шилжүүлж ойр орчимд аюултай байж болзошгүй ямар нэг зүйлийг барилгын өнцөг булан бүрээс хайжээ. Цаг орчим үргэлжилсэн хайгуулын дүнд чухам хаанаас хачин жигтэй үнэр гарч буйг олсон байна.

Гал сөнөөгчид барилгыг бүрэн гүйцэд шалгаж дуусаад олон нийтийг айлгаж цочроосон хачин үнэр дуриан жимснээс гарч байсныг олжээ. Жимсийг агааржуулах хоолойн орчимд ил тавьснаас хачин жигтэй үнэр өрөө тасалгаа дамжин үнэртэж байсныг олж битүүмжлэн хаясан байна. Уг жимсийг 19 дүгээр зууны үед Британийн байгаль орчин судлаач Алфред Рассель Валлас жимсний хаан хэмээн нэрлэжээ.

 

 

Дуриан жимснээс болж бүх нийтийг нүүлгэн шилжүүлж буй тохиолдол Австрали улсад энэ жил хоёр дахиа гарч байна. Өнгөрсөн дөрөвдүгээр сард Мэлбурнийн их сургуулийн цогцолбор байранд хий мэт ихүүн үнэр гарч 600 оюутан, ажилтныг нүүлгэн шилжүүлсний дараа өмхий үнэрт жимс ийн үнэртэж байсныг илрүүлжээ.

 

Эх сурвалж: www.theguardian.com 

---