М.Туяа

Энэ сарын 15-аас Улаанбаатар хот руу түүхий нүүрс оруулахыг хориглосон ажлын хүрээнд Цагдаагийн ерөнхий газраас 58 хүний бүрэлдэхүүнтэйгээр түүхий нүүрсийг нийслэл рүү оруулахгүй байхад хяналт тавихаар болжээ. Нийслэлийн гэр хорооллын 220 орчим мянган айлд түүхий нүүрсний оронд сайжруулсан түлш хэрэглэх талаар мэдээлэл өгч, хяналт тавих ажлыг төвийн зургаан дүүргийн хорооны засаг дарга, хэсгийн ахлагч нар хийх юм. Иргэд сайжруулсан түлшийг 540 орчим цэгээс картаар авах бөгөөд хүссэн хэмжээгээр авахгүй болохыг Агаар, орчны бохирдлын эсрэг “Хүчээ нэгтгэе” чуулганы үеэр хэлэлцлээ. Одоогийн байдлаар сайжруулсан түлш авах картыг хийж байгаа бөгөөд 2-6 тонныг авах эрхтэй байхаар төлөвлөжээ.

Сайжруулсан түлшийг ирэх сарын 15-наас худалдаанд гаргахаар тооцоолсон. Хэмжээний хувьд 25, 600, 900 кг болон нэг тонн гэсэн савалгаатай гаргаж байгаа нэг тонн нь 150 мянган төгрөгөөр борлуулах юм. Чуулганы үеэр БОАЖ-ын сайд Н.Цэрэнбат “Улаанбаатар хотын 220 мянга гаруй гэр хорооллын айл өрхүүдэд сайжруулсан түлш хэрэглүүлэх, түүхий нүүрс хэрэглүүлэхгүй байхад хяналт тавьж ажиллах гэрээт ажилтнууд чуулганаа хийж байна. Төрөөс түүхий нүүрсний хэрэглээг хориглосонтой холбоотойгоор төрийн өмчит “Тавантолгой түлш” компанийг байгуулсан. Одоогоор 60 гаруй мянган тонн сайжруулсан түлш үйлдвэрлэсэн байна” гэлээ.

---