“Уул уурхайгүй Хөвсгөл” ТББ-ын төлөөллүүд өнөөдөр Сүхбаатарын талбайд эсэргүүцлийн жагсаал хийлээ.

Ямар зорилгоор уг суултыг хийж буйг тус ТББ-ын тэргүүн Н.Энхбаатараас тодруулахад “Цэнгэг усны эх болсон Хөвсгөл аймагт уул уурхайн үйл ажиллагаа явуулах гэж байгааг эсэргүүцэж энэ жагсаалыг хийж байна. Австралийн хөрөнгийн биржид бүртгэлтэй БНХАУ-ын хөрөнгө оруулалттай “Аспайр Майнинг” компани Сэлэнгэ мөрнийг өгсөж, олон голын бэлчирийг дайрсан хатуу хучилттай зам тавьж Хөвсгөл аймгийн Цэцэрлэг суманд байдаг Овоотын нүүрсний ордод олборлолт хийх гэж байгаа. Үүнийг эсэргүүцэн жагсаж байна. Энэ зам тавигдсанаар Цагаан-Уул сумын зэс молбидений орд, Мөрөнгийн хойно байдаг фосфорын ордыг ашиглана гэж бид эсэргүүцэж байгаа. Хөвсгөл аймаг аялал жуулчлалаар хөгжих стратегитай. Гэтэл энэ ажил нь түүний эсрэг байгаа учраас бид эсэргүүцэж байна. Манай жагсаалыг хүмүүс биечлэн болон онлайнаар дэмжиж оролцож байгаа” гэв.

Мэдээллийг тэнцвэртэй хүргэх үүднээс бид “Аспайр майнинг” компанийн хуулийн зөвлөх М.Энх-Одоос Хөвсгөл аймагт хэрэгжүүлэх гэж байгаа төслийнх нь талаар тодруулахад:

-“Аспайр Майнинг” ХХК нь Австралийн хөрөнгийн биржид хувьцаагаа  арилждаг нээлттэй компани. Нийт хувьцааны 1/3-ээс дээш нь Монгол Улсын иргэдийн өмчлөлд байдаг. БНХАУ-ын хөрөнгө оруулалт гэх зүйл байхгүй. Манай төслийн талбай Цэцэрлэг сумаас урагш Могойн голын уурхайн хажууд байдаг.

Засгийн газрын мөрийн хөтөлбөрт баруун чиглэлийн хатуу хучилттай зам тавина гэж заасныг хэрэгжүүлж бид хатуу хучилттай зам тавиад уг ордоо ашиглахаар төлөвлөж байгаа. Цэцэрлэг сумаас Мөрөн хүртэл зам харилцаа маш муу. Байгалийн хэцүү тогтоцтой учраас нутгийн иргэд өвлийн улиралд 200 орчим км замыг 12 цаг туулдаг. Мөн тус замаар сүүлийн 50 жил нүүрс тээвэрлэхдээ зарим газраа 32 салаа зам гаргаж байгаль орчныг маш их сүйдэлсэн. Манай компанийн зам тавигдсанаар харин ч байгаль орчинд ээлтэй болно.

Нутгийн иргэд манай ажлыг маш их дэмжиж байгаа. Зам дагаж хөгжил ирнэ гэж баярлаж, замаа хурдан тавьж, ажлаа хурдан эхлүүлээч ээ гэдэг хүсэлтээ тавьсан. Тус сум 2000 орчим хүнтэй боловч ажлын байр байхгүйгээс үр хүүхдүүд нь хот руу сурахаар яваад тэндээ үлддэг юм билээ. Манай компанийн төсөл хэрэгжсэнээр Цэцэрлэг суманд 500 орчим ажлын байр бий болно. Сумын иргэдийн орлого өсч амьжиргааны олон үүсвэртэй болно шүү дээ. Манай компани 2012 оноос хойш өнөөдрийг хүртэлх хугацаанд Цэцэрлэг сумын оюутнуудын 178 сая төгрөгийн сургалтын төлбөрийг төлж, хүн эмнэлгийн байрыг нь шинээр барьж өгсөн. Гал унтраах ангид таван сая төгрөгийн хөрөнгө оруулалт хийсэн гэх мэтээр багагүй хөрөнгө оруулалт хийсэн. Нүүрсний уурхай ашиглалтад орвол эдийн засгийн үр өгөөж нь бүр ч их болно. Нэг зүйлийг нэмж хэлэхэд бид ямар ч фосфорын ордын лиценз эзэмшдэггүй. Манай компани зөвхөн нүүрс олборлодог” гэв.

---