Хуульзүйн дэд сайд асан Б.Энхбаяр хэвлэлд өгсөн ярилцлагадаа “Хуульзүйн сайд Ц.Нямдорж намайг дарамталсан” гэх агуулгатай тайлбар хийсэн билээ. Тэгвэл үүнийг Хуульзүйн сайд Ц.Нямдорж “худлаа” гэжээ.

Мөн түүнээс хөөн хэлэлцэх хугацаа дууссан нэрээр авлигачдад хариуцлага тооцохгүй өнгөрөөж байгаа асуудлаар тодруулахад “судлах үүрэг өгсөн, удахгүй дүнгээ танилцуулна” гэхээс өөр тайлбар өгсөнгүй.

Б.Хурцыг яагаад үргэлжлүүлж хорьсныг тодруулахад “Би яаж мэддэг юм, хорьсон газраас нь асуу” хэмээн сэгүүлчийг загналаа.

Харин хэвлэл, мэдээллийнхэнд ордны коридорт яриа өгөхгүй гэж дургүйлхдэг тэрээр Т.Чимгээ, Б.Содномдаржаа нарыг хэлмэгдүүлсэн эсэх асуултад цааргалалгүй хариулсан юм. Ингэхдээ,

-   Хэлмэгдсэн бол хохирол нөхөн төлөх тухай л яригдах байх. Гэхдээ төлж чадахгүй байх л даа. Энэ гашуун, гай зовлон ямар ч үнээр төлж чадахгүй. Б.Булганыг гэрч ч биш, хохирогч ч биш, хэн ч болгочихсон. Цорын ганц амьд гэрчийг оролцуулахгүйгээр шүүх хурал хийнэ гэж хаашаа харсан юм байдаг юм. Хамгийн гол нь Б.Булганы хэлж зуруулсан гээд байгаа хүмүүсээр Б.Содномдаржаа, Т.Чимгээ нарыг зуруулж гаргаж ирсэн биздээ. Наад зах нь зурсан хүмүүсийг байцаах ёстой биздээ. Эрүүдэн шүүсэн гэдэг нь дэндүү тодорхой асуудал. Өдрөөс өдөрт шинэ зүйл гарч ирж байна. Гүйцэтгэх ажлын хууль тогтоомжийг хамаа, намаагүй зөрчсөн гэдэг нь дэндүү ойлгомжтой. 

---