"Шинэ боломжийг хамтдаа нээцгээе” уриатай “JOB EXPO-2019” ажлын байрны үзэсгэлэн яармаг энэ сарын 17, 18-нд “Blue Sky Tower”-ийн гуравдугаар давхарт зохион байгуулагдах гэж байна. Энэхүү үзэсгэлэнгийн зохион байгуулагч ШУТИС-ийн Төгсөгчдийн холбооны гүйцэтгэх захирал Г.Ангартай ярилцлаа.

-“JOB EXPO-2019” ажлын байрны үзэсгэлэн яармагт хэдэн компани оролцох вэ?

-Монголын ТОП-100 компанийн төлөөлөл болсон шилдэг 30 гаруй компанийн 1200 ажлын байртай танилцаж, сонголтоо хийх боломжтой.  Үзэсгэлэнгийн үеэр ярилцлагын гурван өрөө бэлдсэн бөгөөд зарим ажлын байрны ярилцлагыг шууд хийн тэр өдөртөө ажлын байртай болох боломж бий. “JOB EXPO-2019” үзэсгэлэнд их, дээд сургууль төгссөн залуус, ажил хайж байгаа иргэд, ажлын байрны нөхцөлөө сайжруулахаар сонирхож байгаа хүмүүс ирж болно.

Үзэсгэлэнгийн үеэр ярилцлагын гурван өрөө бэлдсэн бөгөөд зарим ажлын байрны ярилцлагыг шууд хийн тэр өдөртөө ажлын байртай болох боломж бий

-Бусад ажлын байрны үзэсгэлэнгээс ямар давуу талтай вэ?

- ШУТИС-ийн Төгсөгчдийн холбооноос анх удаа зохион байгуулж байгаа ч цаашид жил бүр уг арга хэмжээг зохион байгуулах болно. Монголын ТОП-100 компанийн төлөөлөл болсон 30 гаруй компани оролцохоос гадна Японы шилдэг гурван компани ажлын байрандаа монгол залуусыг ажиллахыг урьж буйгаараа онцлог. Олон тооны шилдэг ажил олгогчдыг ажил идэхтэй хайгчидтай нэгэн дээвэр доор уулзуулдаг заншлыг дараа дараагийн жилүүдэд бий болгоно. Ажил хайж байгаа хүмүүс хэрхэн өөрийгөө илэрхийлэхээ мэддэггүй. Жилийн өмнө  Хас банканд ажилд орохоор өргөдөл өгсөн бол дахин энэ компани намайг ажилд авахгүй юм байна гэсэн бодолтой байдаг. Харин ч жилийн хугацаанд өөрийн мэдлэгээ хэрхэн дээшлүүлсэн, уг байгууллагад орохын тулд өөрийгөө ингэж бэлдсэн гэх мэтээр дахин өөрийгөө сорьж үзэх хэрэгтэй. Энэ бүх боломжийг “JOB EXPO-2019” ажлын байрны үзэсгэлэн яармаг олгож байгаа юм.

-Монголын ТОП-100 аж ахуйн нэгжийн 1200 ажлын байрандаа ажил олгогч хайж байгаа гэсэн. Компаниудын хувьд ямар мэргэжилтэнг ажилд авах хүсэлтэй байна вэ?

Монголын ТОП-100 компанийн төлөөлөл болсон 30 гаруй компани оролцохоос гадна Японы шилдэг гурван компани ажлын байрандаа монгол залуусыг ажиллахыг урьж буйгаараа онцлог

-Инженер болон менежментийн чиглэлийн ажлын байр эрэлттэй байгаа. Тун удахгүй та бүхэнд www.livetv.mn сайтаар дамжуулан 1200 ажлын байрны багцалсан мэдээллийг хүргэнэ. Одоогоор банк, үүрэн холбооны компаниуд, “Шунхлай” ХХК, “Таванбогд” ХХК, “АПУ” ХХК болон уул уурхайн томоохон компаниуд өөрсдийн ажлын байраа танилцуулахаар болсон. Иргэд та бүхэн ажил хайж байгаа, төгсөх дамжааны оюутан залууст энэ сарын 17, 18-нд “Blue Sky Tower”-ийн гуравдугаар давхарт болох “JOB EXPO-2019” ажлын байрны үзэсгэлэн яармагт хүрэлцэн очихыг уриалж өгнө үү хэмээн хүсэж байна.

 

---