АНУ Венесуэлийн Ерөнхийлөгч Николас Мадурогийн эсрэг эдийн засгийн хатуу чанга хориг баталсан. Мягмар гарагт дэд Ерөнхийлөгч Майк Пенс Мадурогийн дэглэмээс татгалзсан генералыг эдийн засгийн хоригоос чөлөөлж буйгаа мэдэгджээ.

Венесуэл улсын тагнуулын дарга асан генерал Мануэл Кристофер Фигуэрагийн нэрийг хар жагсаалтаас хассанаар Мадурогийн талд орсон бусад эрх мэдэлтнүүдийг дагуулна гэж Америкийн Засгийн газар үзжээ.

Сөрөг хүчний удирдагч Хуан Гуаидо өөрийгөө түр хугацаанд Ерөнхийлөгчийн үүрэг гүйцэтгэгчээр зарлахад хамгийн түрүүнд Вашингтоноос хүлээн зөвшөөрсөн юм. Үүнээс гадна дэлхийн 50 гаруй орон Венесуэлийн түр Ерөнхийлөгч бол сөрөг хүчний удирдагч Гуаидо мөн гэж үзсэн.

Энэ хооронд Венесуэлийн дээд шатны шүүх төрийн эргэлт хийхийг оролдсон гэх Парламентын гишүүдийг мөрдөн шалгахыг даалгаад байна. Гуаидо Каракас дахь эрх мэдлийг авч чадахгүй байгаа нь шүүх болон цэргийн эрх баригчид Николас Мадурог дэмжиж байгаатай холбоотой юм.

АНУ тэргүүтэй улс орнууд Венесуэлийн дээд шатны шүүхийг улс төрийн хэрэгсэл болж байна хэмээн буруутгасан. Эдийн засгийн хоригт Дээд шүүхийн Ерөнхийлөгч Майкел Морено, үндсэн хуулийн зөвлөлийн долоон гишүүн багтжээ.

 

 

Эх сурвалж: www.bbc.com

---