Б.Зул

Дэлхийд нэрээ цуурайтуулж буй “The Hu” хамтлаг анхныхаа бүрэн хэмжээний тоглолтоо эх орондоо хийхээр болжээ. Тэд “Гэрэг” хэмээх анхны рок концертоо энэ сарын 23, 24-нд “White Rock” центрт тоглох нь ээ. Энэхүү тоглолт нь тус хамтлагийн анхны тоглолт бөгөөд дэлхийн бусад улсаар тоглох аялан тоглолтуудын эхлэл болж буйгаараа онцлогтой. Тоглолтын тасалбар өчигдрөөс албан ёсоор худалдаанд гарч эхэлсэн бөгөөд тасалбарын үнэ 99999 төгрөг аж. Хамтлагийн залуус тун удахгүй Европын орноор аялан тоглолтоо хийхээр бэлтгэж байгаа гэнэ. Тэдний Европ дахь аялан тоглолт ирэх сарын 6-нд Германы Берлин хотоос эхлэх бол долдугаар сарын 6-нд сүүлчийн тоглолтоо хийх юм байна. Аялан тоглолтын тасалбар тавдугаар сарын 3-наас эхлэн худалдаанд гарчээ.