Монгол улсын хэмжээнд үнийн өсөлт иргэдийн амьдралд хүндээр нөлөөлж буй энэ цаг үед Ерөнхий сайд У.Хүрэлсүхийг бодит нөхцөл байдал буюу хөрсөн дээрээ бууж ажиллах шаардлагыг УИХ-дахь Ардчилсан намын Зөвлөлөөс хүргүүлж байна. 

Өсөн нэмэгдэж буй инфляцид шатахуун болон махны үнэ голлож байгаа бөгөөд шатахууны үнэ ханш нэмэгдэж, төгрөгийн ханш суларч байгаа нь өргөн хэрэглээний бараа бүтээгдэхүүн болоод үйлчилгээний үнэд шууд нөлөөлж өдөр хоногоо залгуулж буй иргэдэд туйлын хүндээр тусч байгаа талаар шаардах бичигт тусгасан юм.

Манай улсын хүнсний хэрэглээний голлох бүтээгдэхүүн гурил, мах байдаг. Гэтэл махны үнэ огцом өсөж, нэг килограмм нь 8000-15000 төгрөгт хүрээд байна. Үүгээр ч зогсохгүй газар тариалангийн ажил эхлэхтэй зэрэгцээд шатахууны үнэ нэмсэн нь ирэх жил гурилын үнэ болон бусад хүнсний бүтээгдэхүүний үнэ өсөх дохио юм.

Иймд экспортын орлого огцом өсч, гадаад валютын зээл, тусламж их хэмжээгээр нэмэгдэж, аливаа гадны эдийн засгийн хориггүй, дэд бүтцийн бүтээн байгуулалтад хөрөнгө зарцуулаагүй нэн таатай эдийн засгийн нөхцөлд валютын ханш өсөж, инфляци нэмэгдэж, хүнсний бүтээгдэхүүн, үйлчилгээний үнэ нэмэгдсэн учир шалтгааныг нэн даруй судлан тогтоож, иргэдийн “халаасыг хоослох” бодлогоо зогсоож, тэдний өдөр тутмын амьдралд шаардлагатай байгаа арга хэмжээг нэн даруй авч, энэ талаараа нийт иргэддээ тайлагнахыг Улсын Их Хурал дахь Ардчилсан намын Зөвлөлөөс Ерөнхий сайд У.Хүрэлсүхээс шаардаж байгааг илэрхийлж байна.

---