Монголчууд бид сайхан сэтгэлтэй ард түмэн өвдөж зовсон, шаналсан нэгэндээ тусалж чаддаг гэдгийг олон сайхан жишээнүүдээс бэлхнээ харж болно. Гэвч өвчнөөрөө далимдуулж мөнгө цуглуулан “залилан” хийх тохиолдол гарах болжээ. Өнгөрсөн онд элэг, бөөр, ясны чөмөг суулгах мэс заслын зардлыг төрөөс хариуцах Засгийн газрын шийдвэр гарсан.

Ингэснээр иргэдийн нуруунаас бага ч гэсэн хөнгөлсөн. Гэвч зарим нэг иргэдийн хувьд УНТЭ-д элэг шилжүүлэн суулгах яаралтай хэрэгтэй тул 100 сая төгрөг хэрэгтэй байна туслаач хэмээн зурагт, сошиол хэрэгслээр цацагдах болжээ. Элэг шилжүүлэн суулгах багийн ахлагч, УНТЭ-ийн ЕМЗК-ийн дарга О.Сэргэлэн “Элэг шилжүүлэн суулгаж байгаа хүнээс хэзээ ч 100 сая төгрөг нэхдэггүй. Улсын төсөв болон өртөг өндөртэй эмийн зардлаас ихэнх зардлыг даадаг бөгөөд иргэдийн хувьд 10 хүрэхгүй сая төгрөгийн зардал гардаг. Мэдээж амьдралын боломж муу хүмүүс байгаа ч өөрийнхөө өвчнөөр далимдуулж хүмүүсээс мөнгө цуглуулан залилан хийх тохиолдол байна” гэсэн юм.

Мэдээж амьдралын боломж муу хүмүүс байгаа ч өөрийнхөө өвчнөөр далимдуулж хүмүүсээс мөнгө цуглуулан залин хийх тохиолдол байна

Үнэхээр таны тус хэрэгтэй, ядарч зүдэрсэн, өвдөж зовсон хүмүүс ч байгаа гэдгийг бас мартаж болохгүй. Хамгийн гол нь хэнд, хэрхэн, хэнээр дамжуулж туслах гэж буйгаа л анхаарах хэрэгтэй. Тус багаддаггүй гэдэг. Тэгээд ч ядарч зүдэрсэн нэгнийхээ төлөө гар сунгаж чадахгүй ч, сэтгэл зовнин байдаг монголчуудын сайхан сэтгэлийг ашиглах гэсэн хүмүүс бас байдаг гэдгийг санах л хэрэгтэй. 

Нөгөөтэйгүүр өөрсдөөсөө ч харамлах шахаж сэтгэл гарган тусалсан таны сэтгэлийн өргөл жинхэнэ эздэдээ хүрч байгааг ч нягтлан шалгаж байхад гэмгүй. 

Учир нь хандивын аян  хөдөлгөөнийг зохион байгуулж байгаа хүмүүс хандив өгсөн хүмүүстээ, цаашлаад олон нийтэд эргээд тайлагнахгүй, өнөө хөөрхий өвчтөн үхсэн эсэх нь мэдэгдэхгүй алга болдог нь нууц биш.

 Олон улсад тухайн улсын иргэд нэгдсэн нэг л хуудас руу хандан түүнээс ямар хүмүүст тусламж хэрэгтэй байгааг мэдэн өөрийн хүсэлтээр мөнгө хандивладаг байна. Таны өгсөн мөнгийг тийм хүнд зарцуулсан гэх мэдээлэл нь хүртэл ордог ажээ. Үүнээс харахад Монголд бусдын өгсөн хандив тусламжийг хэрхэн үр ашигтай зарцуулсан талаарх мэдээлэл, тайлангүй бид хэн нэгэнд тусалсаар байх уу.

---