Өнгөрсөн амралтын өдрүүдэд Увс аймгийн Түргэн сумын Рашаант багт тарваган тахлын сэжигтэй тохиолдол бүртгэгдэж, Улаангом сумын хэмжээнд хорио цээрийн дэглэм тогтоож, орох гарах бүх хөдөлгөөнийг хязгаарласан талаар Увс аймгийн ОБГ-ын орлогч дарга Д.Өлзийтөөс өнөөдөр өглөө тодруулсан билээ.   Тэгвэл өнөөдөр 13:15 цагт лабораторийн шинжилгээгээр тарваган тахал биш хэмээн оношилсон талаар Увс аймгийн Онцгой комиссоос мэдээллээ. 

“Увс аймгийн Түргэн сумын иргэний хувьд өвчилсөн тарвага өвчсөн бөгөөд сэжигтэй тохиолдол илэрсэн тул био шингэнээс шинжилгээ авч Баян-Өлгий аймаг руу шинжлүүлэхээр явуулахад тухайн хүн тарваган тахлаар өвчлөөгүй хэмээн гарсан. Иймд Улаангом сумын хэмжээнд тогтоосон хорио цээрийн дэглэмийг цуцалсан. Тухайн иргэний хувьд гэдэсний халдварт өвчин туссан хэмээн үзэж байна” хэмээн Увс аймгийн  Эрүүл мэндийн газрын дарга Ц.Отгонбаяраас тодруулав.

Гэвч Баян-Өлгий аймагт тарваган тахал өвчин гарсан тул хорио цээрийн дэглэм үргэлжилж байгаа бөгөөд ард иргэдийг үхсэн тарвага оролдохгүй байх, агнах болон мах идэхгүй байхыг зөвлөж байгаа юм.

---