Улсын нэгдүгээр төв эмнэлгийн дэргэдэх Элэг шилжүүлэн суулгах үндэсний багийнхан цусны бүлэг тохироогүй өвчтөнд элэг шилжүүлэн суулгах мэс заслыг Монголд анх удаа хийсэн талаараа өнөөдөр мэдээлэл хийлээ. Элэг шилжүүлэн суулгах мэс заслын хөгжлийг илүү төгөлдөржүүлж, цусны бүлэг таарахгүй өвчтөнд элэг шилжүүлэн суулгах хагалгааг АСАН эмнэлгийн эмч нартай хамтран хийсэн юм.

Энэ оны дөрөвдүгээр сарын 26-нд цусны бүлэг тохироогүй донороос элэг шилжүүлэн суулгах хагалгааг хийсэн бөгөөд охин нь 54 настай аавдаа донор болжээ. Өвчтөн болон донорын биеийн байдал сайн бөгөөд одоогоор эмчилгээ хийлгэж байгаа гэнэ.

Элэг шилжүүлэн суулгах багийн ахлагч, УНТЭ-ийн ЕМЗК-ийн дарга О.Сэргэлэн “Цусны бүлэг тохироогүй хагалгаа хийсэн иргэний хувьд элэгний хатууралтай, хавдартай байсан. Манай эмнэлэг нийт 75 хүнд элэг шилжүүлэн суулгах хагалгаа хийснээс 20 гаруй иргэн элэгний хавдартай байсан бөгөөд эдгээр иргэдээс хавдрын дахилт илрээгүй. Бүлэг тохироогүй хагалгааг амьд донороос авдаг тул хагалгаанд орохын өмнө болон дараа нь тусгай эмчилгээ хийдэг. Учир нь хоёр өөр цусны бүлэгтэй учир дархлаа дарангуйлагч, цусны сийвэнг тохируулах эмчилгээ хийдэг. Хагалгааны явцын хувьд яг л элэг шилжүүлэн суулгах мэс заслын үйл явцтай адилхан зөвхөн хагалгааны өмнө болон дараах эмчилгээгээрээ өөр юм. Одоогоор цусны бүлэг тохироогүй хагалгааг элэг, бөөр шилжүүлэх суулгах хагалгаанд хэрэглэж байгаа бөгөөд өөр эрхтэн болон нойр булчирхай, зүрх шилжүүлэн суулгах хагалгаанд хийх боломжгүй” хэмээв.

УНТЭ-ийн ерөнхий захирлын албан үүргийг түр орлон гүйцэтгэгч Д.Чулуунбаатар “Монгол Улсад эрхтэн шилжүүлэн суулгах мэс заслын зардлыг төр хариуцдаг болсон. Улсаас жилд 24 элэг шилжүүлэн суулгах, 25 бөөр шилжүүлэн суулгах мэс заслын зардлыг гаргадаг. Өнөөдрийн байдлаар 11 хүнд элэг шилжүүлэн суулгах хагалгааг хийсэн бөгөөд тун удахгүй дөрвөн иргэнд хагалгаа хийхээр бэлдэж байгаа. Улсаас мөнгө гаргаж байгаа ч иргэдээс 15-20 сая төгрөгийн зардал гардаг. Гэвч цусны бүлэг тохироогүй донорын хагалгааны зардлын хувьд 30 гаруй сая төгрөгийн зардал гарч байгаа тул дараа жилийн улсын төсөвт цусны бүлэг тохироогүй хагалгааны өртгийг тусгаж өгөхийг хүсэж байна” гэсэн юм.

Цусны бүлэг тохироогүй хагалгааг хийдэг болсноор донорын олдоц 50 хувиар нэмэгдэж байгаа юм

Цусны бүлэг тохироогүй хагалгаа хийдэг 20 гаруй орон байдаг бөгөөд манай улсын эмч мэргэжилтнүүд дээрх хагалгааг бие даан хийх боломжтой гэдгийг саяны өнгөрсөн хагалгаа баталлаа. Өнөөдрийн байдлаар 70 гаруй хүн тархины үхэлтэй донор хүлээж байгаагаас хоёр л донор он гарсаар олдсон байдаг. Цусны бүлэг тохироогүй хагалгааг хийдэг болсноор донорын олдоц 50 хувиар нэмэгдэж байгаа юм. Элэг шилжүүлэн суулгуулах шаардлагатай ч донор олдохгүйгээс тусламж авч чадахгүй тохиолдол манайд цөөнгүй байдаг. Харин цусны бүлэг тохироогүй донороос элэг шилжүүлэн суулгах мэс заслыг манай эмч нар нутагшуулбал донор олдохгүй гэх бэрхшээлийг ардаа орхих маш чухал ач холбогдолтой мэс засал юм. 

 

---