Тайландын эзэн хаан агсан Бумибол Адульядэй 2016 онд таалал төгссөний дараа түүний хүү Маха Важиралонгкорн хаан ширээнд заларсан юм. Энэ жил 66 настай эзэн хаан бямба гарагт Буддын шашны болон Брахмин ёслолоор хаан ширээнд өргөмжлөгдөх ёстой.

Хаан ширээнд өргөмжлөгдөх ёслолоос хэдхэн хоногийн өмнө Маха Важиралонгкорн дахин гэрлэснээ албан ёсоор зарлажээ. Тайландын телевизээр хааны хуримын ёслолыг дамжуулсан байна. Хаан өөрийн бие хамгаалах албаны дэд дарга генерал Сутида Важиралонгкорнтой гэрлэж хатан Сутида хэмээх өргөмжлөл хайрлажээ.

 

 

1782 онд анхдугаар Рама тайландын хаан ширээг авснаас хойш Чакри гүрний 10 дахь Рама хаан болж буй Маха Важиралонгкорн урьд өмнө гурван ч удаа гэрлэж, гэрлэлтээ цуцлуулан долоон хүүхэдтэй болсон юм. Энэ удаад тэрээр дөрөв дэхээ гэрлэж байгаа ба таван хүүгийнх нь нэг албан ёсоор усгаа залгамжлах хунтайжаар өргөмжлөгдөнө.

Эзэн хаан 2016 онд Сутидаг армийн генерал болгож цол хэргэмээр шагнажээ.

Шинэ хатан Сутида Тиджай нь Тай Эйрвэйс нислэгийн компанид онгоцны үйлчлэгчээр ажиллаж байгаад 2014 онд эзэн хааны хувийн бие хамгаалах албаны дэд даргаар томилогдож байжээ. Хааны гэр бүлийн зарим ажиглагчид, гадны хэвлэл мэдээллийн хэрэгслүүд Сутида хаан Важиралонгкорнтой хувийн дотно харилцаатай хэмээн бичиж байсан удаа бий. Гэвч хааны ордноос энэ талаар огт мэдээлэл өгч байгаагүй юм.

 

 

Эх сурвалж: www.cnn.com, www.theguardian.com

---