ISIS буюу Исламын улс хэт даврагсдын бүлгийн удирдагч Абу Бакр аль Багдади өнгөрсөн таван жилийн турш олон нийтийн өмнө ил гарч ямар нэг мэдэгдэл хийгээгүй байсан юм. Хамгийн сүүлд өнгөрсөн наймдугаар сард аудио бичлэгээ илгээсэн бол энэ долоо хоногт 18 минут үргэлжилсэн шинэ видео бичлэгээ илгээсэн тухай олон улсын хэвлэл мэдээллийн хэрэгслүүд дамжуулж байна.

Бичлэгт аль Багдади хажуудаа буу зэвсэг тавьж Багузын дайн дууссан ч бид бууж өгөөгүй, ердөө ялагдсан гэсэн утгатай зүйл ярьжээ. Сирийн Багуз хот Исламын улс зэвсэгт бүлгийнхэнд эзлэгдээд байсан сүүлчийн хот бөгөөд өнгөрсөн гуравдугаар сард хэт даврагсдаас бүрэн чөлөөлсөн.

Мөн аль Багдади улаан өндөгний баяраар Шри Ланкад болсон халдлагыг газар нутгаа алдсан болоод улс төрийн зарим үйл явдлын хариуд өс санаж үйлдсэн хэмээн ярьсан байна. Исламын улс бүлгийн аль Фуркан цахим хуудсанд бичлэгийг даваа гарагт байршуулсан ба энэ сард хийсэн бичлэг хэмээн мэдэгджээ.

Хамгийн сүүлд 2014 оны долдугаар сард тэрээр Мосул хотын их сүмд ярьж буй гэрэл зургаа дэлгэснээс хойш олон улсын хэмжээнд ил тод гараагүй байсан юм. Энэ удаагийн бичлэгийг жинхэнэ эсэхийг тодруулахаар АНУ-ын Засгийн газар ажиллаж байна. 2017 оны тавдугаар сард Америк болон түүний холбоотнуудын хийсэн агаарын дайралтаар Багдади хүнд шархадсан тухай мэдээлж байсан юм.

Олон улсын эвсэл Исламын улс бүлгийн эсрэг дайнд ялсан ч 15,000-30,000 цэрэг Ирак, Сирийн нутагт нуугдаж, алдсан газар нутгаа эргүүлэн авахаар зэхэж байна гэх мэдээлэл бий. Зэвсэгт этгээдүүд Ирак, Сирийн хилийн дагуу 88,000 км кв талбайд өөрсдийн халифын вант улсаа байгуулахаар тэмцэж эхэлсэн.

 

 

Ердөө 47 настай ч сахал үс нь бууралтсан аль Багдадийн жинхэнэ нэрийг Ибрахим Авард Ибрахим аль Бадри гэдэг ба 1971 онд Иракийн Самаррад төрсөн гэж үздэг. Хүүхэд байхдаа Коран судар, шашны хууль дүрмийг ягштал цээжилж, цээжээр уншин дүрэм зөрчсөн гэр бүлийнхэндээ шийтгэл оноодог байжээ. Ахлах сургуулиа төгсөөд Иракийн Саддам их сургуулийн Коран судлалын ангид мастер, докторын зэрэг хамгаалжээ. 2000 оны үед Аль Кайдатай холбогдож Исламын улс зэвсэгт бүлгийг толгойлсон байна.

 

Эх сурвалж: www.cnn.com, www.bbc.com

---