Газар зохион байгуулалт, Геодези, зураг зүйн газраас Монгол Улсад газар өмчлөгч, эзэмшигчдийн бүх мэдээллийг ил тод болгож байгаа асуудлаар өнөөдөр 11.00 цагт мэдээлэл хийлээ.
Газар зохион байгуулалт, Геодези, зураг зүйн газрын дэд дарга А.Батбаяр “Энэ жилийг иргэн төвтэй ухаалаг болгох жил болгон зарласны дагуу газрын харилцааны мэдээллийг ил тод болгож байна. АТГ-аас газрын харилцааны салбарыг авлигад хамгийн өртөмхий хэмээн зарласан учир үйл ажиллагаагаа шилэн, ил тод нээлттэй болгож байна. Манай салбарт өнөөдрийн байдлаар 1000 гаруй хүн ажиллаж байна. Манай байгууллага 21 аймаг, нийслэл, 9 дүүрэг, 330 сум суурин газарт өөрсдийн ажилтантай.

2018 онд улсын хэмжээнд нийт 1091873 газар өмчлөгч, эзэмшигч, ашиглагч 6.9 сая га газрыг өмчилж, эзэмшиж, ашиглаж байгаа нь өмнөх оны мөн үеэс 55,767-оор өссөн үзүүлэлт боллоо. Монгол Улсын иргэд газар өмчлүүлэх хууль батлагдсанаас хойш 15 жил өнгөрч байхад нийт хүн амын ердөө 19.4 нь газар өмчлөх эрхээ хэрэгжүүлсэн байна. Монгол Улсын 615,454 хүн газар өмчилж байна. Энэ онд үнэгүй өмчлүүлэх зориулалтаар 5686.7 га газрыг, аж ахуйн зориулалтаар 25.45 га газрыг өмчлүүлэхээр төлөвлөлөө.

Монгол Улсын иргэнд нэг удаа газар өмчлүүлэх хууль 2028 оныг хүртэл үргэлжилнэ. Манай байгууллага иргэдэд ил тод үйл ажиллагаа явуулах ажлын хүрээнд цахимаар дуудлага худалдаа зохион байгуулах ажлыг хэрэгжүүллээ.
Газрын трассыг тогтоох, иргэдэд давхардуулан газар олгохгүй байх, нийгмийн байгууламж, зам тавихаар төлөвлөсөн газарт газар олгохгүй байх ажлыг аймаг, нийслэлийн иргэдийн хуралтай хамтран хийж байна. Мөн газар өмчлөгч, эзэмшигчийн бүх мэдээллийг улсын бүртгэлд бүртгэдэг болсон.

Мөн "Хур" системээр дамжуулаад иргэний хурууны хээг уншуулж маш богино хугацаанд бүртгэл мэдээлэл хийх ажлыг хэрэгжүүлж байна. Энэ оны 11 сар гэхэд энэ систем бүрэн ажиллаж эхэлнэ. Иргэд дан системийг ашиглан өөрийнхөө газар эзэмшил өмчлөлтэй холбоотой бүх мэдээллийг авах боломжтой боллоо. Мөн газартай холбоотой гаргасан өргөдөл гомдлын шийдвэрлэлт хаана ямар шатанд явааг мэдэх боломжтой болсон. Дан системийг ашиглан улсын хэмжээнд өмчлөл, эзэмшил, ашиглалтаар бүртгэгдсэн бүх газрын мэдээллийг авах боломж бүрдсэн” гэдгийг хэллээ. Дан систем руу нэвтрэхийн тулд www.gazar.gov.mn хаягаар орох юм байна.

---