Нийслэлийн ИТХ-ын хурлын ээлжит XXIV хуралдаан өчигдөр боллоо. Хуралдаанаар зарим тогтоолыг хүчингүй болгох зэрэг асуудлыг хэлэлцсэн юм.

Нийслэлийн Засаг даргын нэгдүгээр орлогч Ж.Батбаясгалан нийслэлийн ИТХ-аас баталсан таван тогтоолыг хүчингүй болгох үндэслэл, төслийг төлөөлөгчдөд танилцууллаа. Тухайлбал, нийслэлийн ИТХ-аас 2015 онд баталсан ахмад настны нийтийн тээврийн хэрэгслээр үнэ төлбөргүй зорчих тогтоолыг хүчингүй болгохоор төсөлд тусгасан байна. Ахмад настны нийтийн тээврийн хэрэгслээр үнэ төлбөргүй зорчих журам нь Хөдөлмөр, нийгмийн хамгааллын яамны эрхлэх асуудлын хүрээнд шилжсэн учир тогтоолыг хүчингүй болгож байна гэсэн юм.

Энэхүү шийдвэр нь иргэдийн дунд "Ахмад настнуудын үнэ төлбөргүй зорчдогийг болиуллаа" гэсэн эргэлзээг олон түмний дунд төрүүлж орхисон байна. Үүнтэй холбогдуулан НИТХ-аас энэ талаар тодруулахад "Нийслэлийн иргэдийн төлөөлөгчдийн хурал зөвхөн хотоос баталсан журмыг цуцалсан. Учир нь уг журмыг ХНХЯ баталдаг болсон. Иймд давхардсан журмыг хүчингүй болгосон гэж ойлгохоос биш, ахмад настнуудыг үнэ төлбөргүй зорчдогийг болиулсан гэж ойлгож болохгүй" гэсэн юм. 

---