УИХ-ын нэгдсэн чуулганы өнөөдрийн хуралдаан 10:00 цагт эхэлж Усны тухай хуульд нэмэлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэж эхэлсэн боловч хэлэлцэх эсэх асуудлыг хэлэлцэх үеэр уг хуульд нэмэлт өөрчлөлт оруулах шаардлагагүй гэж УИХ-ын дийлэнх гишүүд үзжээ. Иймд уг хуулийг хэлэлцэх шаардлагагүй гэж үзэн төслийг хууль санаачлагчид буцаалаа. 

Усны тухай хуулийг Улсын Их Хурлын гишүүн Л.Энхболд нарын таван гишүүн санаачилж, 2018.03.22-ны өдөр өргөн мэдүүлсэн аж.

Үүний дараа парламент Монгол Улсын Эрдэнэсийн сангийн 2018 оны төсвийн гүйцэтгэл, Монгол Улсын Эрдэнэсийн сангийн үндсэн сангийн орлого, үндсэн болон гүйлгээ сангийн зарлагын 2019 оны төсвийн тухай Улсын Их Хурлын тогтоолын төслийг хэлэлцэж эхэллээ.

Уг хуулийг хэлэлцэх явцад Монгол улсад үйл ажиллагаа явуулж буй арилжааны банкуудад хийсэн шалгалт, Монгол банкинд хяналт шалгалт хийх, саяхан дампуурлаа зарласан "Капитал" банкны асуудал, Т.Аюурсайхан гишүүний тавьсан асуулгын дагуу банк санхүүгийн системийг эрүүлжүүлэх байдал, валютын ханшийн өнөөгийн нөхцөл байдлын талаар ажлын хэсэг байгуулах санал ирүүлсэн зэргийг хэлэлцэхээр боллоо. 

Гэхдээ уг асуудлыг "ХААЛТТАЙ" хэлэлцэх нь зүйтэй гэж үзсэнээр чуулганы үйл ажиллагааг хаалттай горимд шилжүүллээ.

---