Замын-Үүд сумын улс хооронд зорчигч болон ачаа тээвэр эрхлэгчдийн эрх ашиг зөрчигдөж байгаа талаар тэндэхийн иргэд, жолооч, ТББ-ынхан өнөөдөр мэдээлэл хийлээ

Замын-Үүд суманд 19 мянга гаруй иргэн оршин суудаг бөгөөд 70 гаруй хувь нь тээврийн үйлчилгээ эрхэлж амьжиргаагаа залгуулдаг байна.

Гэвч тэдний хил дээр ажиллах нөхцөл маш хүнд болжээ. Тухайлбал, монгол жолооч нар Замын-Үүд-Эрээний боомтоор 1992 оноос ачаа, тээвэр эрхэлж эхэлсэн. Гэтэл өнөөдөр хятадын боомтын талаас монгол жолооч нарт дарамт шахалт үзүүлж, татвар татаас авч, зодож дарамтлахаас гадна бичиг баримтыг нь дур зоргоороо хурааж, авах нь энгийн үзэгдэл болсон байна.

Мөн чөлөөт бүс гэх нэг хашаа руу жолооч нарыг оруулж нэг машинаас 350-500 юань авдаг болжээ. Улмаар жолооч нарын хил нэвтрэх эрхийг дураараа хасч, боомилох, хөөж туух нь ч ихэсчээ. Гэвч зохицуулалтаараа 4-5 хүний суудалтай автомашинаар л хил нэвтрэх эрхтэй бөгөөд УАЗ 469 машинаар л хил нэвтрэх боломжтой. Гэвч энэ асуудалд Монголын талаас нэг удаа ч анхаарал хандуулж, эрх нь зөрчигдөж байгаа иргэд, жолооч нараа хамгаалах арга хэмжээ аваагүй байна. Харин ч дээрээс нь нэмж сүрдүүлж, шахаж хавчдаг байна. Тиймээс энэ асуудалд анхаарал хандуулж эрх нь зөрчигдөж байгаа хүмүүсийнхээ эрх ашгийг хамгаалахыг төр засгийн удирдлагуудаас тэд хүсч байна.

---