Малайзын нийслэл Куала Лумпураас Австралийн Перт хотын чиглэлд AirAsia компанийн D7236 дугаар нислэгийн үеэр хоёр сартай нярай амьсгал хураасан хэрэг гарчээ. Перт хотын иргэн зорчигч Надиа Парензигийн хэлснээр нярай Саудын Арабаас ирсэн эцэг эхийн хамт явж байсан ч бие нь тавгүйрхэж гар дээр нь амьсгал хураасан байна.

Онгоцонд байсан бусад зорчигчдын ярьснаар нислэг эхлэхээс өмнө Саудын Арабын гэр бүл тогтворгүй, сандарсан мэт харагдаж байсан гэжээ. Нислэгийн багийнхан өөрсдийн нөөц бололцоогоор эрүүл мэндийн анхны тусламж үзүүлсэн ч нярайн амийг аварч чадаагүй байна.

Онгоцны үйлчлэгч эмэгтэй нярайг эцэг эхэд нь биш хажуугийн зорчигч  Парензид тэврүүлэхийг хүсчээ. Учир нь аав ээж нь залуу гэр бүл учир маш их бухимдаж аргаа олохгүй байсан гэж зорчигчид ярьсан байна. Парензигийн үргэлжлүүлэн ярьснаар хүүхдийг аваад төд удалгүй ямар нэг зүйл буруу болж буйг мэдээд хашгирч эмчийн тусламж хүссэн ч тусалж чадаагүй гэжээ.

Нислэгийг газардсан даруйд AirAsia-ын ажилтнууд цагдаа нар болон эмнэлгийн мэргэжилтнүүдтэй уулзсан байна. Нислэгийн компанийн зүгээс зорчигчдын аюулгүй байдал, эрүүл мэнд хамгийн эрхэм зүйл гэдгийг мэдэгдэж, эмгэнэл илэрхийлжээ.

 

Эх сурвалж: www.theguardian.com

---