Бээжин хотноо энэ сарын 25-27-нд болох “Бүс ба Зам” олон улсын хоёрдугаар форум болно. Энэ удаагийн форумд ОХУ, Пакистан, Казахстан, Австри, Азербайжан, Беларусь, Чех, Египет, Грек, Унгар, Итали, Монгол, Филиппин, Серби, Сингапур, Тажикстан, Тайланд, Арабын Нэгдсэн Эмирт зэрэг дэлхийн 40 орчим улсын төр, засгийн тэргүүн нар, 150 орчим орны төлөөлөгч оролцох ажээ. Форумтай холбоотойгоор БНХАУ-ын Гадаад хэргийн сайд Ван И “Бүс ба Зам” бол нээлттэй санаачилга. Сонирхсон бүхэнд нэгдэхийг урьж байна” гэжээ. Тэрбээр Хойд Солонгосын тал төлөөлөгчдөө энэ форумд оролцуулахаар илгээснийг мэдэгдээд тэд АНУ-ын төлөөлөгчидтэй тэгш эрхтэйгээр олон улсын энэ чуулга уулзалтад оролцохыг онцолсон байна.

Мөн Хятадын Гадаад хэргийн сайд “Бүс ба Зам” форумыг олон улсын Засгийн газрууд, бизнесийн хүрээнийхэн өргөнөөр сонирхдог болсныг мэдэгдээд форум нь дэлхийн эдийн засгийн хөгжилд түлхэц өгөх, хамтын ажиллагааг тэлэхэд чухал ач холбогдолтойг онцолсон байна. Түүнчлэн “Бүс ба Зам” санаачилгын ачаар эртний Торгоны замын үеийн харилцааг сэргээж, стратегийн түншлэлийн харилцаагаа өргөжүүлж, дэлхийн эдийн засгийг хөгжүүлэхэд түлхэц өгнө гэдэгт эргэлзэхгүй байгаагаа илэрхийлжээ. Бээжинд болох олон улсын хоёр дахь форумд оролцогчдын тоо өмнөхөөсөө хоёр дахин нэмэгдсэн байна. 

Анхдугаар форум Бээжин хотод 2017 оны тавдугаар сард болж, 29 улсын төр, засгийн тэргүүн нар оролцож байсан юм. “Бүс ба Зам” нь худалдаа, тээврийн одоо байгаа зурвасуудыг сайжруулах, Төв Ази, Европ, Африкийн 60 гаруй улсыг холбосон ийм зурвасуудыг шинээр бий болгоход чиглэсэн санаачилга юм. Уг санаачилгын гол зорилго Хятад болон дэлхийн улс орнуудын худалдааны харилцааг хөгжүүлэх аж. “Торгоны замын эдийн засгийн бүс” байгуулах санаачилгыг БНХАУ-ын дарга Ши Жиньпин гаргасан бөгөөд 2013 оны есдүгээр сард Казахстанд төрийн айлчлал хийх үеэрээ Астана хотод үг хэлэхдээ ийм төсөл эхлүүлснийг анх мэдэгдсэн билээ.

---