Дархан-Уул аймгийн Дархан сумын 14 дүгээр баг “Миний монгол цэцэрлэгт хүрээлэн” /Хүүхдийн парк/-ийн 44.5 га газар нь тусгай хамгаалалтад байдаг. Тэгвэл энэ сарын 2-нд тус газраас 8.4 газрыг орон нутгийн тусгай хамгаалалтаас гаргах тухай тогтоолыг Дархан-Уул аймгийн ИТХ-ын төлөөлөгчдөөр хэлэлцүүлэн батлуулсан байна.

Тэгвэл зарим нэг сошиал хаягаар уг 8.4 га газарт 24 ширхэг 9 давхар орон сууцны хороолол барих гэж байна гэсэн мэдээллийн дагуу бид тус аймгийн ИТХ-төлөөлөгч О.Энхзаяатай холбогдон мэдээлэл авав.

Дархан-Уул аймгийн ИТХ-ын төлөөлөгч О.Энхзаяа: Хүүхдийн паркад орон сууц баригдана гэсэн бол би очоод хэвтчих байсан

-Ямар учраас Хүүхдийн паркийн 8.4 га газрыг тусгай хамгаалалтаас гаргасан юм бэ?

-Манай хотын иргэдээс жил бүр хүүхдийн паркийн талбайг тоглоомтой болгох санал ирдэг. Энэ дагуу өнгөрсөн жилээс “Хүүхэд залуучуудын соёл амралтын цогцолбор"-ын төслийг хэрэгжүүлсэн юм билээ. Уг төслийн хүрээнд улсын хөрөнгөөр биш хувийн хөрөнгөөр хүүхдийн парк байгуулж, менежментийг нь хувийн компаниа хариуцан ажиллах юм. Тусгай хамгаалалтын газарт барилга, байгууламж байгуулахыг хориглодог учраас дээрх 8.4 га газарт хүүхдийн парк байгуулах учраас тусгай хамгаалалтаас гаргах тогтоолыг ИТХ-аар танилцуулсан. Миний хувьд хувийн бизнес эрхэлдэг, хувийн компани хүүхдийн парк байгуулаад менежментийг аваад явж чадна нь гэдэгт итгэлтэй учраас уг асуудлыг дэмжсэн.

Хүүхдийн паркийн 8.4 га газарт барилга, орон сууцны хороолол баригдана гэсэн нэг ч үг байгаагүй ийм асуудал байсан бол миний хувьд дэмжихгүй

-Зарим нэг мэдээллээр 8.4 га газарт орон сууцны хороолол барих гэж байна гэсэн?

-Хүүхдийн паркийн 8.4 га газарт барилга, орон сууцны хороолол баригдана гэсэн нэг ч үг байгаагүй  ийм асуудал байсан бол миний хувьд дэмжихгүй. Ер нь тэр газарт орон сууцны хороолол баригдах байсан бол эсэргүүцэн очоод хэвтчих байсан. Тэглээ ч сонгууль ойртож байгаа үед ИТХ-ын төлөөлөгч нар тус газарт  орон сууц, барилга бариулах эрсдэлтэй шийдвэр гаргахгүй.

Дархан-Уул аймгийн ИХ-ын төлөөлөгч Н.Лхагвасүрэн:

Тусгай хамгаалалтаас гаргасан байхад ирээдүйд орон сууц, барилга барих бүрэн боломжтой

Бид энэ талаар Дархан-Уул аймгийн ИТХ-н төлөөлөгч Н.Лхагвасүрэнгээс тодруулсан юм.

Үнэндээ 8.4 газарт бүхэлдээ хүүхдийн парк байгуулах боломжгүй. Тэгэхээр ирээдүйд тус газрын зарим хэсэгт орон сууц, барилга барих боломжтой хэмээн үзэж байна

-Таны хувьд 8.4 га газрыг тусгай хэрэгцээт газраас чөлөөлөх хэрэггүй гэж үзэн эсрэг санал гаргасан гэсэн. Яагаад тэгсэн бэ?

-Улсын хөрөнгө оруулалтаар хүүхдийн парк байгуулж болно шүү дээ. Заавал 8.4 га газрыг тусгай хамгаалалтаас гаргах шаардлага байхгүй. Гэвч Дархан-Уул аймгийн ИТХ нь 33 төлөөлөгчтэйгээс гурав нь бие даагч бөгөөд бусад төлөөлөгчид нь МАН-ынхан олонхийн саналаар уг газрыг тусгай хамгаалалтаас гаргасан. Яахав хурлын үеэр дээрх газарт хүүхдийн парк байгуулна хэмээн танилцуулсан. Миний гол хардаж байгаа зүйл бол Улаанбаатар хотын Хүүхдийн паркийн газрыг яг энэ маягаар тусгай хамгаалалтаас гарган хувийн аж ахуйн нэгжүүд өмчлөн, барилга, байгууламж барьсан. Яг энэ шиг зүйл ирээдүйд манай Дарханы хүүхдийн паркад тохиолдож болзошгүй хэмээн үзэж байна. Үнэндээ 8.4 газарт бүхэлдээ хүүхдийн парк байгуулах боломжгүй. Тэгэхээр ирээдүйд тус газрын зарим хэсэгт орон сууц, барилга барих боломжтой хэмээн үзэж байна.

Энэ оны хоёрдугаар сарын 11-нд Миний Монгол цэцэрлэгт хүрээлэнгийн 8.4 га газарт “Хүүхэд, залуучуудын соёл амралтын цогцолбор”-ын зориулалтаар хөрөнгө оруулалт, үйл ажиллагааны менежмент хийх хуулийн этгээдийн эрх бүхий аж ахуйн нэгж байгууллагыг сонгон шалгаруулах тендер зарлагдаж 2019 оны гуравдугаар сарын 04-нд “Минж проперти” ХХК, “Бурхантын ирээдүй” ХХК хамтран хэрэгжүүлэхээр шалгарчээ.

Уг ажлыг Эх, үрсийн баярын өмнө дуусгахаар талууд гэрээ байгуулсан аж. Батлагдсан төсөл /эскиз/ зургийн дагуу цэцэрлэгт хүрээлэнгийн төлөвлөж буй хэсгийн тоглоомуудтай, олон нийтийн үйл ажиллагаа явуулах идэвхтэй амралтын хэсэг байхаар төлөвлөж цаашид уг ажил үргэлжлэн үе шаттайгаар хөгжүүлэх, шинэчлэх ажлыг хийхээр тусгасан байна.

 

---