Энэ долоо хоногт УИХ-ын чуулганаар Ус бохирдуулсны төлбөрийн тухай хуульд нэмэлт өөрчлөлт оруулах хуулийг хэлэлцэх гэж байна.

Даваа гаригт МАН-ын бүлгээр уг хуулийг хэлэлцээд дэмжсэн билээ. Гэвч энэхүү хуулиар ус бохирдуулсны төлбөрийг 50-60 хувь бууруулж, усыг хамгийн ихээр бохирдуулдаг уул уурхайнхнаас ус бохирдуулсны төлбөр авахгүй байх нөхцөл үүсээд байна гэж Байгаль орчны төлөөх ТББ-ууд болон хуульчид үзэж байна.

Тиймээс уг хуулийг батлахгүй байхыг УИХ-аас шаардаж байна. Мөн уг хуулийг 2012 онд баталсан ч Засгийн газар хуулиа огт хэрэгжүүлээгүй байдаг. Засгийн газрын энэхүү эс үйлдэхүй нь хууль зөрчсөн үйлдэл учир Захиргааны хэргийн шүүхээс Засгийн газарт хуулиа хэрэгжүүлэхийг өнгөрсөн 2-р сард даалгасан байдаг.

Гэвч Засгийн газар шүүхийн шийдвэрийг үл тоон энэхүү хуулийг батлуулахаар улайрч байгаа нь уул уурхайтай, эрх мэдэлтэй хүмүүсийг хаацайлсан, тэдний талд үйлчилсэн үйлдэл болж байна гэж тэд үзэж байна. Манай улс цэвэр усны нөөц асар багатай улс. Гэтэл ус бохирдуулсны төлбөрийг жинхэнэ бохирдуулагчаас авахгүй байх нөхцөл бүрдэж байгаа нь маш буруу гэж үзэж байна. Тиймээс энэ хуулиа татаж авахыг УИХ-аас шаардаж байна.

Энэ парламeнт байгуулагдсанаасаа хойш байгальд ээлтэй нэг ч хууль батлаагүй атал байгальд хамгийн халтай хууль батлах гэж байгаад харамсч байгаагаа ч илэрхийллээ.
Мөн баталсан хуулиа хэрэгжүүлэхгүй хууль зөрсөн үйлдлээ хаацайлахын тулд нэмэлт өөрчлөлт гэж оруулж ирсэн хоёр лахь тохиолдол гэдгийг ч онцоллоо.
Тиймээс УИХ-ын гишүүд энэ тeррорист хуулийг битгий батлаач гэж уриалж байна. Хэрэв байгаль орчинд халтай энэ хуулийг баталбал батлахад кноп даралцсан гишүүдийг дараагийн сонгуульд сонгохгүй байх кампанит ажил өрнүүлэх болно гэдгээ онцоллоо.

---