Бид өмнө нь  мэдээлсэнчлэн Төв цэвэрлэх байгууламжид осол гарч дөрвөн иргэн амь насаа алдсэн хэргийг яг одоо газар дээрээс нь сурвалжлан хүргэж байна. 

Осолдсон иргэдийн эхний хоёр цогцсыг 16:34 минутад гаргаж авсан бол гурав дахийг 17:09 цаг, дөрөв дэх цогцсыг 17:23 цагт гаргаж авчээ. Ослын газарт газ алдсан учир онцгой байдлын алба хаагчид шумбалт хийх боломжгүй болж 5м урттай төмрөөр тэмтэрч цогцсуудыг гаргаж авчээ. Одоогоор ослын шалтгаан нөхцөл тодорхой болоогүй, цагдаагийн албаныхан шалгалтаа үргэлжүүлж байна.

Ослын газрыг цагдаагийн хамгаалалтад авсан учир хэвлэл мэдээллийнхнийг дотогш нэвтрүүлэхгүй байна. 

Нэмэлт мэдээлэл,

1964 онд анх ашиглалтад орсон уг байгууламжийн тоног төхөөрөмж, хүчин чадал нь муудсаар байгаа бөгөөд өнгөрсөн 2-р сард шинэ цэвэрлэх байгууламж барих гэрээнд гарын үсэг зурсан билээ. 

Өнөөдрийн байдлаар төв цэвэрлэх байгууламжид 170 гаруй хүн ажилладаг. Тэд өдөр тутамдаа 300 гаруй химийн хортой бодистой орчинд ажилладаг байна. Мэргэжлийн байгууллагын тогтоосноор Төв цэвэрлэх байгууламжид нийлүүлж буй уснаас есөн төрлийн хүнд метал илэрдэг бөгөөд хүнд металийн хордлогын үр дагавар хүний биед шууд илрэхгүй ч хожим бие эрхтнийг нь хордуулдаг байна.

Өөрөөр хэлбэл, тус байгууламжийн ажилчид хүнд, хортой нөхцөлд ажилладаг боловч хүнд хортой нөхцөлд ажиллаж байгаа шалтгаанаар ямар нэгэн нэмэгдэл цалин урамшуулал авдаггүй байна. 

---