Хүний эрхийн төрийн бус байгууллагуудын форумаас “Жижиг дунд үйлдвэрлэлийг хөгжүүлэх сан ба авлига” сэдэвт хэлэлцүүлгийг өчигдөр зохион байгууллаа. Уг хэлэлцүүлгээс гарсан санал зөвлөмжийг нэгтгэн НҮБ-ын Хүний эрхийн зөвлөлд хүргүүлэх юм. Жижиг дунд үйлдвэрлэлийг хөгжүүлэх сангаас олгосон нэн хөнгөлттэй зээлийг төрийн өндөр албан тушаалтнууд албаны эрх мэдлээ урвуулан ашиглаж авсан болох нь тогтоогдсон.

 

“Жижиг дунд үйлдвэрлэлийг хөгжүүлэх сан ба авлига” сэдэвт хэлэлцүүлгээр тус сантай холбоотой өмнө гарсан алдаа дутагдлыг шүүн хэлэлцэж, цаашид авч хэрэгжүүлэх арга замын талаар ярилцаж гарц шийдэлд хүрэх юм байна.

 

Жижиг, дунд үйлдвэрийг хөгжүүлэх сангаас урт хугацаатай, хөнгөлөлттэй зээл олгох, төсөл сонгон шалгаруулах журмыг саяхан шинэчлэн баталжээ. Уг журмаар 20-300 хүртэлх сая төгрөгийг ЖДҮХС-аас, харин 300 саяас дээш дүнтэй зээлийг арилжааны банкаар дамжуулан олгохоор журамлажээ.

Уг журмын дагуу сангийн үйл ажиллагааг шилэн болгож, зээл сонгон шалгаруулах санхүүжүүлэх үйл ажиллагааг олон нийтэд нээлттэй болгосон.

 

---