Агаарын бохирдол гэх айдас хүйдэс улиран одлоо. Гэвч долоон сарын дараа дахиад л хортой агаараар амьсгалж эхэлнэ. Улсын болон гаднын хөрөнгө оруулалтаар жил бүр агаарын бохирдлыг бууруулах ажлын хүрээнд ажил хийдэг ч бодит үр дүн харагдахгүй Улаанбаатарчууд бид эрүүл мэндээрээ хохирч үлдэж байгаа билээ. Тэгвэл энэ онд Агаарын бохирдлыг бууруулах үндэсний хорооны төсөвт 75 тэрбум төгрөг тусгасан. Мөн нийслэлийн төсөвт агаарын бохирдлыг бууруулах ажлын хүрээнд 3.4 тэрбум төгрөг төсөвлөжээ.

“Gascom” ХХК-ийн ерөнхий захирал С.Хүрэлбаатар “Хийн халаалтыг нэвтрүүлэх замаар Улаанбаатар хотын агаарын бохирдлыг бууруулах биш арилгах боломжтой” хэмээв

Тэгвэл өнөөдөр агаар болон орчны бохирдлыг бууруулах чиглэлээр ажилладаг хувийн аж ахуйн нэгжүүд болон төрийн болон төрийн бус байгууллагын төлөөлөл нар “Агаарын бохирдлын эсрэг хүчээ нэгтгэе” хэлэлцүүлгийг хийлээ. Хэлэлцүүлгийн үеэр агаарын бохирдлыг бууруулах чиглэлээр хийж хэрэгжүүлж байгаа ажил бодит амьдрал дээр хэрхэн хэрэгжиж байна. Цаашид аж ахуй нэгжүүд агаар, хөрсний бохирдлыг бууруулахад ямар ажил хэрэгжүүлж байгааг сонсон төр засгаас дэмжих боломжтой эсэхийг судлахаар болсон юм.

Хэлэлцүүлгийн үеэр “Gascom” ХХК-ийн ерөнхий захирал С.Хүрэлбаатар “Хийн халаалтыг нэвтрүүлэх замаар Улаанбаатар хотын агаарын бохирдлыг бууруулах биш арилгах боломжтой” хэмээв. Тэрбээр хийн халаагуурыг төр засаг дэмжих юм бол гаднын шийдлийг нутагшуулан хямд өртгөөр гэр хорооллын айл өрхүүдийг хийн халаагууртай болгох боломжтой. Заавал гаднын орнууд шиг гэр хорооллын айл өрхүүдэд хийн хоолойн шугам тавих шаардлагагүйгээр тухайн айл өрхөд сууриулах юм. Тухайн айлын хүмүүс зөвхөн халаагуураа асаах, унтраах товч дарна бусдыг нь манай компани хариуцах юм” гэсэн юм.

Сайжруулсан түлш борлуулж эхэлнэ гэдэг нь агаарын бохирдлыг “арилгах, бууруулах” шийдвэр биш зүгээр л төсвийн мөнгийг өөр хэлбэрээр зарцуулах шийдэл юм

Хэлэлцүүлэгт оролцсон аж ахуй нэгжүүдийн хувьд төр засаг агаарын бохирдлыг бууруулахад даацтай шийдвэр гаргахгүй, өнгөцхөн, төсөвлөсөн мөнгөө хий дэмий зүйлд зарцуулж байна. Энэ жилийн тавдугаар сараас түүхийн нүүрс борлуулахыг хориглож, сайжруулсан түлш борлуулж эхэлнэ гэдэг нь агаарын бохирдлыг “арилгах, бууруулах” шийдвэр биш зүгээр л төсвийн мөнгийг өөр хэлбэрээр зарцуулах шийдэл юм. Цахилгаан халаагуур хэрэглэхийг зөвлөж байгаа ч цахилгааны хүчин чадал хүрэхгүй, өртөг өндөр байгаа энэ үед хийн халаагуурыг төр засаг дэмжих юм бол агаарын бохирдлыг бууруулах биш арилгаж чадна хэмээн хэлэлцүүлгийн үеэр хэд хэдэн оролцогчид онцлон ярьсан юм.

 

 

---