БЗД-ийн Ардчилсан намынхан өнөөдөр Нийслэлийн захиргааны гадаа жагсаал зохион байгууллаа. Тэд ямар учир шалтгаанаар жагсаж байгаа талаар бид БЗД-ийн ИТХ-ын төлөөлөгч М.Далайцэрэнгээс тодрууллаа.

М.Далайцэрэн:

- Хоёр төрлийн шаардлага хүргүүлж бид жагсаал хийж байна.

Эхнийх нь БЗД-ийн засаг даргатай холбоотой хууль бус захирамжийг Хотын дарга С.Амарсайхан гаргасан. Энэ хууль бус захирамжаа цуцлахыг шаардаж байна.

Хоёрдугаарт, Хотын дарга С.Амарсайханы ах С.Уламбаярын компани барилга барих нэрээр Туул голын 2,5 га газрын бургасыг хядсан. Энэ бусармаг үйлдлээ зогсоохыг мөн шаардаж байна. Бид тодорхой хуулийн үндэслэл тавьж шаардаж байна.

БЗД дээр 03-р сарын 23-нд болж өнгөрсөн ИТХ-ын нөхөн сонгууль хуулийн хуулийн хүчингүй болсон заалтыг үндсэлж явсан. Гэтэл энэ хүчингүй хуулийн заалтаар явсан сонгуулийг үндсэлж хотын дарга хууль бус шийдвэр гаргасан. Хууль бус согнуулийн шийдвэрийг үндсэлж хууль бусаар Бат-Амгаланг гэгчийг дүүргийн засаг даргыг батламжилсан. Үүнийг бид хүлээн зөвшөөрөхгүй байна.

Нөгөө талаар хотын дарга С.Амарсайхан хотын дарга болохдоо БЗД-ээс сонгогдсон долоон төлөөлөгчийн дэмжлэгийг авч сонгогдсон. Өөрөөр хэлбэл, энэ долоон төлөөлөгчийг барьцаалсан. Тиймээс энэ долоон төлөөлөгчид өр төлөх байдлаар хуулиа зөрчиж ажиллахаа зогсоохыг шаардаж байна.

2017 онд хотын дарга С.Батболд мөн хууль бус захирамж гаргаж Э.Бат-Амгаланг БЗД-ийн засаг даргаар томилж байсан ч шүүхээс хууль бус гэдгийг нь тогтоогоод энэ шийдвэр нь хүчингүй болж байсан. Өнөөдөр энэ байдал мөн давтагдаж байна.

Мөн С.Амарсайхан дарга хэвлэлийнхэнд ярилцлага өгөхдөө БЗД-ийн засаг дарга Т.Баясах, ИТХ-ын дарга Ш.Ганчимэг нартай зөвшилцөх албан бичиг хүргүүлсэн тухай ярьсан. Гэвч энэ нь худал. Яагаад гэвэл одоогоор нэг ч удаа БЗД-ийн засаг дарга Баясах болон ИТХ-ын дарга Ганчимэг нартай уулзаж, хэлэлцэх санал, албан бичиг ирүүлээгүй.

Түүнчлэн БЗД-ийн засаг дарга Т.Баясахыг өөрийн хүсэлтээр чөлөөлөгдсөн гэж ярьсан. Гэтэл Т.Баясах дарга ажлаас чөлөөлөгдсөнөө мэдээгүй явж байсан. Тиймээс удаа дараа иргэдийг хуурсан энэ үйлдлээ зогсоогооч гэж Баянзүрхчүүд шаардаж байна гэсэн юм. 

Харин хотын захиргааны гадаа жагссан АН-ын хэсэг нөхөд хотын дарга С.Амарсайханд шаардлагаа өгөөд гарч ирсэн. Энэ үеэр БЗД-ийн АН-ын дарга Д.Пүрэвдаваа:

- Бидний шаардлагыг НЗДТГ-ын дарга М.Отгонбаяр хүлээж авлаа. Хуулийн хүрээнд асуудлыг шийдэж өгөхийг хүсч шаардлагаа өглөө. Нэмэлтээр хоёр асуудал тодруулсан.

Юун түрүүнд, БЗД-ийн засаг дарга Т.Баясахыг чөлөөлсөн хуулийн заалт. Монгол улсын засаг захиргаа, түүний нэгж, нутгийн удирдлагын тухай хуулийн 32,1-ийг үндсэлж чөлөөлсөн байгаа юм. Гэвч энэ заалт нь өөрийн хүсэлтээр өргөдлөө өгөөд чөлөөлөгдөх заалт. Тиймээс М.Отгонбаяр даргаас Т.Баясах даргын өөрийн хүсэлтээр өгсөн өргөдөл нь байна уу гэдгийг тодруулсан. Байхгүй гэж хариулсан.

Мөн  БЗД-ийн ИТХ-ын 03-р сарын 29-ний 03-р тогтоолын дагуу Т.Баясах гэдэг хүнийг ажлаас нь чөлөөлсөн байна. Энэ тогтоолтой нь танилцахад БЗД-ийн ИТХ-ын тогтоолыг хууль бусаар үйлдэж, ИТХ-ын дарга Ш.Ганчимэгийн оронд Г.Атармаа гарын үсэг зурсан байна. Бичиг баримтыг хуурамчаар үйлдсэн нь гэмт хэрэг гэж үзээд бид АТГ-т Нийслэлийн засаг дарга С.Амарсайханыг өгч байна.

---