Венесуэлийн мянга мянган иргэн олон улсын хилийн хаалтыг эвдэж хөрш зэргэлдээ Колумб улс руу дүрвэсэн тухай Боготагийн цагаачлалын газраас мэдээлжээ. Уг хэрэгт Венесуэлийн Ерөнхийлөгч Николас Мадуро хариуцлага хүлээх ёстой гэж анхааруулсан байна.

Сөрөг хүчний удирдагч Хуан Гуаидо өөрийгөө түр Ерөнхийлөгчөөр зарлаж барууны орнуудаас тусламж хүссэний дараа Мадуро Колумбтай хиллэдэг хоёр гүүрийг чингэлэг, том машинаар хааж олон улсын тусламжийн цувааг нэвтрүүлэхээс татгалзсан. Харин дүрвэгсэд хилийн дагуу Колумбын Кукута хотод хүрэхийн тулд хаалтуудыг Тачира гол руу унагаж, ажил хүнс эрүүл мэндийн тусламж үйлчилгээ хайхаар явжээ.

Хилийн дагуу гарсан эмх замбараагүй байдалд Мадуро хариуцлага хүлээх ёстой гэж Колумбын цагаачлалын газрын дарга Кристиан Кругер мэдэгдсэн байна. Мадуро төр барьж улсын эдийн засаг тартагтаа тулснаас хойш олон сая иргэн Колумбын хилээр дамжиж Латин Америкийн орнууд руу дүрвээд байгаа юм.

Сөрөг хүчний удирдагчийг Ерөнхийлөгчөөр хүлээн зөвшөөрсөн 50 гаруй улсын тоонд Америк, Колумб багтсан. Колумбын Засгийн газар Венесуэлийн дүрвэгсдэд эрүүл мэнд, боловсролын тусламж үйлчилгээ үзүүлэхэд маш их хэмжээний мөнгө зарцуулж байгаа гэдгийг мэдэгджээ.

 

 

Эх сурвалж: www.reuters.com

---