Авлигатай тэмцэх газраас 2017 онд Авто тээврийн үндэсний төвд гэнэтийн шалгалт хийж, удирдлагууд нь үгсэн хуйвалдаж, С зөвшөөрөл олгох хууль бус үйлдэлд гар бие оролцдог ноцтой баримтыг тухайн үед олсон билээ. Эдгээр хүмүүсийн албан тушаалаа урвуулан ашиглаж, хэтэвчээ зузаатгасан хэргээс болж өнөөдөр Гашуунсухайт, Ганцмодын хилийн боомтоор нүүрс тээвэрлэж байгаа машины тоо хэд дахин нэмэгдсэн. Зохицуулалтгүй олгосон их хэмжээний тусгай зөвшөөрлийн улмаас жолооч нар 13-15 хоногт нэг удаа тээвэр хийж, хугацаа хожих гэсний улмаас нэгэнтэйгээ уралдах, осол аваар гаргах, эрүүл мэнд, амь насаараа хохирохоос эхлээд маш олон асуудал хүндэрсээр байгаа.

“С” зөвшөөрөл олгохоор шийдвэрлэсэн АТҮТ-ийн даргын тушаалыг 24 цагийн дотор Тээврийн нэгдсэн системийн мэдээллийн санд байршуулж байхаар болсон байна

Тэгвэл уг байдлыг таслан зогсоохын тулд Зам, тээврийн хөгжлийн яам, Автотээврийн үндэсний төвөөс “С” зөвшөөрөл олголтын журмын төсөл боловсруулжээ. Уг төсөлд заахдаа “С” зөвшөөрөл олгохоор шийдвэрлэсэн АТҮТ-ийн даргын тушаалыг 24 цагийн дотор Тээврийн нэгдсэн системийн мэдээллийн санд байршуулж байхаар болсон байна.

Авлигатай тэмцэх газрын Хяналт шалгалт, дүн шинжилгээний хэлтсийн дарга Х.Хашбаатар “Одоогийн байдлаар “С” зөвшөөрөлтэй холбоотой хоёр ч эрүүгийн хэрэг шалгагдаж, нэг хэрэг нь шүүхээр шийдэгдээд байгаа. Энэ асуудлыг журамлаж, авлига гарах шалтгаан, нөхцөлийг нь арилгаж шийдвэрлэхгүй бол цаашид ч олон албан тушаалтан холбогдох магадлалтай байна. “С” зөвшөөрөл олгох үйл явц ил тод биш  учраас хүнд суртал чирэгдэл үүсгэж, улмаар хээл хахууль өгөх, авлигын гэмт хэрэг үйлдэгдэж байна. Автотээврийн үндэсний төвөөс “С” зөвшөөрлийг ямар компанид хэдэн ширхэг олгосон, юунаас болоод зөвшөөрөл олгоогүй вэ гэдэг мэдээлэл ил тод биш байна. Нууц далд асуудал бүрийн цаана авлига, хээл хахууль, ашиг сонирхлын зөрчил байдаг. Тиймээс Авлигатай тэмцэх газар улс хоорондын ачаа тээврийн “С” зөвшөөрөл олгож байгаа үйл явцыг ил тод, нээлттэй болгох чиглэлээр ажиллах болно” хэмээв.

Автотээврийн үндэсний төвөөс “С” зөвшөөрлийг ямар компанид хэдэн ширхэг олгосон, юунаас болоод зөвшөөрөл олгоогүй вэ гэдэг мэдээлэл ил тод биш байна

2017 онд Автотээврийн үндэсний төвийн Тээвэр зохицуулалтын хэлтсийн дарга Д.Батбаяр “С” зөвшөөрөл олгохдоо хахууль авсан үйлдэлд Авлигатай тэмцэх газар эрүүгийн хэрэг үүсгэн шалгасан бөгөөд уг хэргийг шүүхээс торгох ял оноон шийдвэрлэсэн. Мөн албаны эрх мэдэл, албан тушаалын байдлаа урвуулан ашиглаж системд бүртгэлгүй автотээврийн хэрэгслийг бүртгэсэн тус төвийн албан тушаалтны хэргийг Авлигатай тэмцэх газраас шүүхэд шилжүүлэх саналтайгаар прокурорт шилжүүлээд байна. “С” зөвшөөрлийг Автотээврийн үндэсний төвөөс гаргуулж аваад цааш дамлан худалдаалдаг бүлэг хүртэл байдаг гэх яриа иргэдийн дунд таржээ.

Өнөөдрийн байдлаар 13 мянган машин “С” зөвшөөрлөөр нүүрс тээвэрлэж байна. Үүний 12-13 хувь нь дотоодын аж ахуйн нэгжийн тээвэрлэгчид юм байна. Сүүлийн таван жилийн хугацаанд дотоодын ачаа тээвэрлэх машин 15 хувиар нэмэгдсэн аж. Автотээврийн үндэсний төвд нэг улиралд зөвхөн Гашуунсухайт боомтоор нүүрс хил давуулан тээвэрлэх “С” зөвшөөрлийн 8000 хүсэлт ирдэг байна.

2017 онд Автотээврийн үндэсний төвийн Тээвэр зохицуулалтын хэлтсийн дарга Д.Батбаяр “С” зөвшөөрөл олгохдоо хахууль авсан үйлдэлд Авлигатай тэмцэх газар эрүүгийн хэрэг үүсгэн шалгасан бөгөөд уг хэргийг шүүхээс торгох ял оноон шийдвэрлэсэн

Автотээврийн үндэсний төв ТӨҮГ-аас улс хоорондын ачаа тээвэрлэлт гүйцэтгэж буй 7 боомтын 169 аж ахуй нэгжүүд болон холбогдох байгууллагууд “Тээврийн нэгдсэн систем” хэмээх цахим системийг ашигласнаар зөвшөөрөл авсан компаниудын тээврийн хэрэгсэл гаалийн хяналтын бүсэд нэвтрэхээс гадна хилээр нэвтрэх боломж бүрдэх юм. Мөн нэг жолооч олон компанид бүртгэлтэй байх байдал арилхаас гадна жолоочийн давхардал үүсэхгүй, жолооч нарын бодит тоо гарах ач холбогдолтой гэдгийг албаныхан хэллээ.

Тээвэрлэгч аж ахуй нэгжүүдийн хувьд энэхүү системд нэвтэрч тухайн жолоочийн регистрийн дугаарыг оруулахад мэргэшсэн эсэх нь программ дээр гарч ирэх бөгөөд мэргэшсэн жолоочийн хуурамч үнэмлэхтэй эсэхийг тогтооход хялбар болж байгаа юм.

---