Ж.Сайхан

Баянзүрх дүүргийн ИТХ ээлжит хуралдаанаа хуралдуулж төлөөлөгчдийн бүрэн эрхийг батламжлах, Тэргүүлэгчдийн бүрэлдэхүүнийг өөрчлөх, дүүргийн Засаг даргыг томилох асуудлыг хэлэлцжээ. Өнгөрсөн 2016 онд явуулсан тус дүүргийн ИТХ-ын сонгуулийн үеэр зарим нэр дэвшигчид мөнгө тараасан маргаан гарснаар гурван шатны шүүх хэргийг хянаж, энэ сарын 23-нд дахин сонгууль явуулаад байгаа. Дахин сонгуульд МАН-аас нэр дэвшигч Б.Галцог, Г.Доржпалам нар олонхын санал авсан тул Сонгуулийн ерөнхий хорооноос гаргасан тогтоолыг үндэслэн бүрэн эрхийг нь хүлээн зөвшөөрч, батламжилсан байна. Ийнхүү МАН-ын төлөөлөгчид олонх болсон тул Баянзүрх дүүргийн ИТХын хуралдаанаар Засаг даргад Э.Бат-Амгаланг дэмжиж, батламжлуулахаар нийслэлийн Засаг даргад нэрийг нь өргөн барьсан юм.

Тэгвэл нийслэлийн Засаг дарга С.Амарсайхан Баянзүрх дүүргийн ИТХ-аас ирүүлсэн саналыг судалж, Э.Бат-Амгаланг дүүргийн Засаг даргаар томилох шийдвэр гаргажээ.

Э.Бат-Амгалан нь

• нийслэлийн Сүхбаатар дүүргийн I бүрэн дунд сургуулийг 1994 онд төгсөж,
• 1998 онд МУИС-ийн Олон улсын худалдааны дээд сургуулийг Гадаад албаны ажилтан,
• 2002-2004 онд МУИС-ийн Хууль зүйн дээд сургуулийг Эрх зүйч мэргэжлээр дүүргэжээ.
• Тэрбээр 2008-2010 онд Баянзүрх дүүргийн ЗДТГ-ын Үйлдвэр, үйлчилгээний хэлтсийн дарга,
• 2010-2011 онд “Үндэсний цэцэрлэгт хүрээлэн” НӨҮГ-ын орлогч дарга,
• 2015 онд “Чингис хаан” нисэх буудлын гадаад харилцааны тасгийн даргын албыг хашиж байсан гэнэ.
• Мөн 2010 нь НАМЗХ-ны дэд ерөнхийлөгчөөр ажиллаж байсан бөгөөд 2013 оноос МАН-ын Бага хурлын гишүүн,
• 2016 оноос нийслэлийн ИТХ-ын төлөөлөгч, Баянзүрх дүүргийн МАН-ын даргын албыг хашиж буй аж.

---