Ц.Амгаланбаатар, Ж.Содномдаржаа, Т.Чимгээ гурав манайхтай нэг гудам, хамар хашааны жаахан хүүхдүүд байсан. Т.Чимгээг сайн мэдэхгүй. Ц.Амгаланбаатар ялангуяа Ж.Содномдаржаатай манай дүү нар нэг дошин дээр тоглож өссөн.

Анхнаасаа манай дүү цахилгааны нөхцөлөөс шатсан гэдэг л ойлголттой байснаас биш хүн алсан хэрэгт холбогдсон гэж мэдээгүй байсан. Тэгээд 5-6 жил өнгөрсний дараа манай эмэгтэй дүүг дуудаж байцаасан байдаг юм. Асуугаад, араас нь дагадаг байсан.  

Манай дүүг цуг явж байсан, гадаах юмыг нь харж байсан... биш... С.Зориг агсныг алчихаад байж байхад нь манай дүү гал тогоонд нь хоол унд идээд, хөргөгчийг нь уудлаад зогсч байсан гэж Ц.Амгаланбаатар гэдэг хүн ярьдаг гэсэн. Яг юу болсон, яасан ийсэн, ямар үндэслэлээр хэрэгт холбосныг би мэддэггүй. Тухайн үед 20 настай л байсан.

...Манай эмэгтэй дүүд хэлсэн байдаг юм байна лээ л дээ.

- Танай дүү чинь том хэргийн гэрч байна. Тэгээд энэ хүний гэрийг мэдэж байсан учраас амийг нь бүрэлгэсэн байна. Тэгэхээр энэ цахилгааны асуудал биш, хүн галдан шатаасан асуудал гэж хэлээд Тагнуулынхан манай эмэгтэй дүүд хэлж уулзсан байдаг.

Бид нар тийм ойлголтоор шүүх хурал хүртэл явсан. Шүүх хуралд орохын яг өмнөх өдөр манай дүүд өмгөөлөгч авч ороорой гэж хэлсэн байдаг. Тэгээд өмгөөлөгч хайхаар олддоггүй юм байна л дээ. С.Зоригийн хэрэг гэхээр хүн болгон татгалздаг юм билээ. Тэгээд бид таньдаг хүнээ авсан. Тэр хүн 3 цагийн дотор л хавтаст хэрэгтэй танилцаад маргааш нь шүүх хурал руу орсон. Хоёр дахь өдрийн шүүх хурал дээр манай өмгөлөөгчийг оруулаагүй.

...Шарилыг ухах үед, нэг өглөө манай ээж бид хоёрыг Тагнуулын ерөнхий газар /ТЕГ/ дээр аваачаад манай ээжийг /80 гарсан хүн/ цонхгүй нэг өрөөнд суулгачихаад намайг машинд суулгаад оршуулгын газар луу аваад явсан. Тэгээд очоод би заах/ шарилыг/ болж байгаа юм. Би 10 гаруй жил очоогүй учир олно гэдэг хүнд байсан. Ах дүү нар, гадаадад байгаа нэг дүү рүүгээ хүртэл утасдаж байгаад зааж өгсөн. Тэгээд тэмдэглэгээ хийгээд, маргааш өглөө нь мөн л намайг ирээд аваад явсан. Шинжилгээ авна гээд авсан. ДНК-ийн шинжилгээ авч байна гэсэн. Тэгээд танай дүүгийн шарилыг ухсан. Шинжилгээ хийсэн. Хэрэг мөрдөлтөд шаардлагатай байсан учир ухсан гэж тайлбарласан.

-Яг өнөөдрийн нөхцөлд ямар дүгнэлт хийж байна?

-Бид анхандаа нээрээ л тийм хэрэг хийсэн юм болов уу гээд эргэлздэг байсан. Сая бичлэг, эрүүдэн шүүсэн асуудал гарангуут арай ч тийм зүйл хийгээгүй юм байна гэдэг ойлголтыг авч эхэлж байна.

-Та гомдож байна уу?

-Гомдохоор барах уу. Бид учиргүй их эд мөнгөөр хохироогүй ч гэсэн тодорхой хэмжээнд хохирсон. Хамгийн гол нь сэтгэл санаагаар. Одоо миний ээж 80 гарчихсан. Бараг өнөө маргаашгүй болчихсон. Тэгээд гал голомтыг нь авч үлдсэн отгон хүүхэд нь ийм байдалд орохоор үнэхээрийн хүнд байдаг. Байнгын нойрны эмтэй. Ямар сайндаа л сая сайдыг уучлал гуйсныг ээждээ үзүүлэхээр нойрны эмнээсээ татгалзаад унтах байх даа л гэж найдаж байна.

Б.Нямжаргалын дүү Б.Отгонбаатар 2006 онд гэр бүлээрээ шатаж нас барсан билээ. Түүнийг тухайн үед цахилгаанаас үүдсэн галд шатаж нас барсан гэж үзэж байсан ч таван жилийн дараа С.Зориг агсны хэрэгтний сэжигтэн, хамсаатан байсан гэх асуудал ч гарч эхэлсэн юм...

---