Нэгдсэн улсын Ерөнхийлөгч Дональд Трамп болон Өмнөд Солонгосын төрийн тэргүүн Мүн Жэ Ин нар ирэх сард уулзалтын ширээний ард сууна гэж эх сурвалжууд мэдээлж байна. Хоёр удирдагчийн дээд хэмжээний уулзалтын сэдэв Умард Солонгосын цөмийн хөтөлбөрийн гэрээ хэлэлцээр болон Солонгосын хойгийн аюулгүй байдлыг хангах талаар байх юм.

Вашингтонд уулзалтыг товлосон ба дөрөвдүгээр сарын 11-ний өдөр болно гэж Цагаан ордны хэвлэлийн төлөөлөгч Сара Сандерс мэдээлжээ. Өнгөрсөн хоёрдугаар сард Вьетнамын нийслэл Ханой хотод болсон Трамп, Ким Жон Уны дээд хэмжээний уулзалт хэдийгээр үр дүнгүй өндөрлөсөн боловч Нэгдсэн улс нөхцөл байдлыг эергээр харж байгаа юм.

Төрийн нарийн бичгийн дарга Майк Помпео “тууштай шургуу ажил, дипломат хүчин чармайлтаар бид илүү сайн үр дүнд хүрнэ гэж итгэж байна. Бидний урд хол зам бий учир хийх ажил их байна” гэжээ. Харин Умард Солонгосын байр суурь эсрэгээрээ байгаа юм. Пхеньяны төлөөлөгч Чое Сон Хуй саяхан ОХУ-д хийсэн айлчлалынхаа үеэр хэлэлцээр түр саатсан гэж үзэж байгаагаа илэрхийлжээ.

Өмнөд Солонгос улс Умард Солонгос болон Америкийн хэлэлцээрт гол зуучлагчийн үүрэг гүйцэтгэж байгаа. Тиймээс Трамп Мүн Жэ Инийг урьж тоглоомыг хэрхэн үргэлжлүүлэх тухай ярилцах гэж байна гэж ажиглагчид харж байна.

Хоёр улсын харилцааг сайжруулж зуучлагчийн үүргээ сайн гүйцэтгэвэл Мүн Жэ Иний улс төрийн байр сууринд ихээхэн ач тустай гэж Солонгосын талын шинжээчид үзжээ. Учир нь 2017 оны сонгуулийн дараа тэрээр ард түмнээс 84,1 хувийн дэмжлэг авсан бол энэ долоо хоногт иргэдийн санал асуулгаар 46,3 хувийн дэмжлэг авчээ. Нөгөө талаар Солонгосын хойгийн эв найрамдал хөгжин цэцэглэлт эдийн засгийн өндөр ач холбогдолтой юм.

 

Эх сурвалж: www.cnn.com

---